موزەفەر ئه‌حمه‌د عه‌باس
پەرلەمانی کوردستان بە یەکێک لە گرنگترین و بەهێزترین دامەزراوە دەستووری و سیاسییەکانی هەرێمی کوردستان ئەژمار دەکرێت؛ ئەم دامەزراوەیە نەک تەنها ڕەنگدانەوەی ئیرادە و ویستی ڕاستەقینەی خەڵکی کوردستانە، بەڵکو بەردی بناغەی پرۆسەی یاسادانان، چاودێریکردنی کارەکانی حکومەت و پاراستنی ماف و ئازادییە گشتییەکانە. لەبەر ڕووناکیی ئەم پێگە گرنگە، پرسی کاراکردنەوەی پەرلەمان نابێت بە هیچ جۆرێک لە گۆشەنیگای تەسک و ململانێی حیزبییەوە سەیر بکرێت، بەڵکو دەبێت لە چوارچێوەی بەرژەوەندییە باڵاکانی نەتەوەیی، نیشتمانی و پاراستنی قەوارەی دەستووریی هەرێمدا بنرخێندرێت.
لە چرکەساتێکی هەستیاری سیاسی و هەرێمایەتیدا، پاڵپشتیکردن لە هەوڵەکانی پارتی دیموکراتی کوردستان بۆ کاراکردنەوەی پەرلەمان، پێویستییەکی حاشاهەڵنەگرە و دەبێتە هەوێنی گفتوگۆیەکی گشتگیری نیشتمانی. چالاکبوونەوەی پەرلەمان تەنها خواستێکی سیاسی نییە، بەڵکو ئەرکێکی ڕەوای دامەزراوەییە بۆ ڕووبەڕووبوونەوەی تەحەدییە سیاسی، ئابووری و کۆمەڵایەتییەکانی جەرگەی کۆمەڵگەی ئێمە. پەککەوتنی دامەزراوە دەستوورییەکان ڕاستەوخۆ کاردەکاتە سەر ئاسایشی نەتەوەیی و سەقامگیریی هەرێم، بۆیە تێپەڕاندنی ئەم دۆخە لە ڕێگەی کاراکردنەوەی گۆڕەپانی یاسادانانەوە دەستپێدەکات.
گرنگە هەموو هێزە سیاسییەکان بگەڕێنەوە سەر ئەو ڕاستییەی کە جیاوازیی ڕوانگە، بیرۆکە و بەرنامەی حیزبی، بەشێکە لە سەرمایەی دیموکراتی؛ بەڵام هیچ جیاوازییەکی حیزبی نابێت ببێتە پاساو بۆ لەکارخستنی دامەزراوە نیشتمانییەکان یان لاوازکردنی بەهای سیاسیی هەرێمی کوردستان. بەرژەوەندیی گشتی و بەهێزکردنی دامەزراوەکان ئەو خاڵە هاوبەشەن کە دەبێت هەموو ئاڕاستە جیاوازەکان لە دەوری کۆببنەوە.
لە هەمان کاتدا، پاڵپشتیکردنی هەوڵەکانی پارتی دیموکراتی کوردستان بۆ کاراکردنەوەی پەرلەمان بە مانای کەنارگیرکردنی ڕەخنەی دروست، چاودێریکردن یان بەدواداچوون بۆ ئەدای سیاسی نییە. پاڵپشتیی ڕاستەقینە و بنیاتنەر لەسەر بەهێزکردنی سەروەریی یاسا و پێوەرە نیشتمانییەکان دادەمەزرێت. بە یەکگرتوویی و هەڵگرتنی ئەم بەرپرسیارێتییە نیشتمانییە، لایەنەکان دەتوانن پەرلەمان بڕازێننەوە بە دەنگ و ئیرادەی ڕاستەقینەی جەماوەر و قەوارەی هەرێمی کوردستان بەرەو سەقامگیرییەکی زۆرتر و پاشەڕۆژێکی روونتر ببن.
