پۆلیسی هەولێر ئاگادارییەکی بڵاوکردەوە و تێیدا هاتووە، ئەوانەی لە تیکتۆک لایڤ دەکەن، پێویستە لە 15 رۆژدا سەردانیان بکەن بۆ پڕکردنەوەی بەڵێننامە و وەرگرتنی رێنمایی فەرمی.
ئەمڕۆ سێشەممە 03-11-2026 بەڕێوەبەرایەتیی پۆلیسی پارێزگای هەولێر ئاگادارییەکی بڵاوکردەوە بۆ سەرجەم ئەو هاووڵاتییانەی بەکارهێنەری تۆڕە کۆمەڵایەتییەکانن (بەتایبەت پلاتفۆرمی تیکتۆک)، کە لەڕێگەی دەرکەوتن و لایڤەوە مامەڵە دەکەن.
پۆلیسی هەولێر دەڵێت، “بە مەبەستی پاراستنی دابونەریت و کولتووری کۆمەڵایەتی و رێگریکردن لە دیاردەی نەخوازراو، سەرجەم هاووڵاتییان ئاگادار دەکەنەوە لەمەودوا بە هیچ شێوەیەک رێگەپێدراو نییە لە تۆڕە کۆمەڵایەتییەکان بەکارهێنانی وشەی نەشیاو، جنێودان، سووکایەتیکردن بەیەکدی یان بڵاوکردنەوەی وێنە و ناوەرۆکی نەگونجاو.”
وەکو لە پۆلیسی هەولێر ئاماژەی پێداوە، “ئەو جۆرە رەفتارانە جگە لەوەی دژ بە بەهای کۆمەڵایەتین، دەبنە هۆی دروستبوونی چەندین کێشە و تاوان، بۆیە هەر کەسێک سەرپێچی بکات، رووبەڕووی لێپرسینەوەی تووندی یاسایی دەبێتەوە.”
لە کۆتاییدا بەڕێوەبەرایەتیی پۆلیسی هەولێر ئەوەشی خستووەتەڕوو، “ئاگاداری ئەو کەسانە دەکەينەوە کە لە تۆڕە کۆمەڵایەتییەکان لایڤ ئەنجام دەدەن، پێویستە لە ماوەی 15 رۆژدا سەردانی بەڕێوەبەرایەتیی پۆلیسی پارێزگای هەولێر بکەن بە مەبەستی دروستکردنی دۆسيەی تایبەت، پڕکردنەوەی بەڵێننامە و وەرگرتنی رێنماییە فەرمییەکان.” هۆشدارییش دەدات لەوەی، “هەر کەسێک پابەند نەبێت، خۆی بەرپرسیار دەبێت لە بەرامبەر یاسادا.”
