ئه‌مڕۆ سێشه‌م 24ی10ی2022، كۆبوونه‌وه‌ی هاوبه‌شی پارتی دیموكراتی كوردستان و بزووتنه‌وه‌ی گۆڕان به‌رێوه‌چوو، دواتر راگه‌یاندراوێك بۆ ڕای گشتی بڵاوكرایه‌وه‌و كه تێیدا هاتووه، له باره‌گای مه‌كته‌بی سیاسی پارتی له قه‌زای پیرمام له كۆبوونه‌وه‌ی هاوبه‌شی هه‌ردوو پارتدا تاوتوێی بارودۆخی هه‌ستاری ناوچه‌كه به گشتی و عێراق و هه‌رێمی كوردستان به‌تایبه‌تی گفتوگۆیان له‌باره‌وه كرا.
له به‌شێكی دیكه راگه‌یاندراوه‌كه‌دا هاتووه، هه‌ردوولا كۆكبوون بۆ كۆكردنه‌وه‌ی هه‌موو هێز و تواناكان بۆ پاراستنی قه‌واره‌ی هه‌رێمی كوردستان و دانانی ستراتیژیه‌تی هاوبه‌شی نیشتیمانی هێز و لایه‌نه سیاسییه‌كان بۆ هه‌ڵگرتنی به‌رپرسیاریه‌تی قۆناغه‌كه.
هه‌روه‌ها راشگه‌یاندراوه، له ته‌وه‌رێكی دیكه‌ی كۆبوونه‌وه‌كه‌دا جه‌خت له به‌هێز كردنی په‌یوه‌ندییه‌كانی نێوان هه‌ردوولا كرایه‌وه، به‌تایبه‌تی پاڵپشتی كردنی حكومه‌تی هه‌رێمی كوردستان بۆ هه‌نگاوه‌كانی له‌گه‌ڵ حكومه‌تی فیدڕاڵی له پێناو دابینكردنی مافه ده‌ستوورییه‌كانی هه‌رێمی كوردستان و شایسته داراییه‌كان، له نێوانیاندا مووچه‌ی مووچه خۆران و باشتركردنی بژێوی ژیان و گوزه‌رانی هاووڵاتییانی هه‌رێمی كوردستان.
