ڕەجەب تەیب ئەردۆغان، سەرۆک کۆماری تورکیا، دوای کۆبوونەوەی کابینەی حکومەتی وڵاتەکەی لە ئەنقەرە، هەڵوێستی ڕەسمیی تورکیای سەبارەت بە پەلامارەکانی ئەم دواییەی ناوچەکە ڕاگەیاند و بە توندترین شێوە سەرکۆنەی هێرشی حوسییەکانی کرد بۆ سەر فڕۆکەخانەی نێودەوڵەتیی شا خالید لە شاری ڕیازی پایتەختی عەرەبستانی سعودییە.
لە وتارەکەیدا دوای کۆبوونەوەی کابینەکە، سەرۆک کۆماری تورکیا جەختی لەسەر هاوسۆزی و پشتیوانیی وڵاتەکەی بۆ شانیشینی عەرەبستانی سعودییە کردەوە و ڕایگەیاند: “ئێمە لەبەرامبەر ئەم هێرشە نایاسایی و نامرۆڤانەیەدا بە تەواوی لەگەڵ سعودییە و برا سعودییەکانماندا وەستاوین.”
ئەم لێدوانەی ئەردۆغان لە چوارچێوەی هەوڵە دیپلۆماسییەکانی ناوچەکەدایە بۆ ڕەتکردنەوەی هەر جۆرە دەستدرێژییەک کە ئاسایش و سەقامگیریی وڵاتانی کەنداو و ناوچەکە دەخاتە مەترسییەوە.
