چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
نووسەرێکی کوردی سووریا پرسیار دەکات بۆچی پەکەکە دژی بڵاوبوونەوەی هێزەکانی پێشمەرگەیە لەناو خاکی خۆیان و بۆ پاراستنی هاووڵاتییانی خۆیان؟ ئەم کارەی پەکەکە بە داگیرکاری و تەنگپێهەڵچنین دادەنێ و دەڵێ پێویستە چەکدارانی پەکەکە بگەڕێنەوە مەیدانی راستینەی خۆیان لە باکووری کوردستان و هەرێمی كوردستان جێبێڵن.
جەمال حەمێ لە وتارێکیدا لەسەر تۆڕی کۆمەڵایەتیی (فەیسبووک) نووسیویەتی،بەدواداچوونی بۆ کردووە و دەڵێ ”رێکخراوی پەکەکە لەو هەنگاوەیدا دوژمنکارانەیە، کە رێ بە بڵاوبوونەوەی هێزەکانی پێشمەرگە نادات لەناو خاکی خۆیان پارێزگاری لە خاک و خەڵکەکەی بکات“.
جەختیش دەکاتەوە ”بوونی پەکەکە لەو ناوچانە ناشەرعی و نایاسایی و داگیرکارانەیە، پێویستە پەكەكە هەرێمی كوردستان جێبێڵێ و بگەڕێنەوە بۆ باکووری کوردستان“.
ئەو نووسەرە کوردە ئاماژە بۆ ئەوەش دەکات ”قەزای شنگال بەشێکە لە هەرێمی کوردستان و کەوتووەتە ناو ناوچە کێشەلەسەرەکان و چاوەڕێی ئەوە دەکات مادەی 140ی دەستووری عێراق جێبەجێ بکرێ، بۆ ئەوەی بگەڕێتەوە سەر جوگرافیای راستینەی خۆی کە هەرێمی کوردستانە“.
دەشڵێ هەرێمی کوردستان بەشێکە لە عێراق و ئەمە واقعێکە ناتوانن بەسەریدا باز بدەن، بۆیە ئاساییە شنگال بگەڕێتەوە سەر هەرێم، کە خاوەن دامەزراوەی شەرعیی خۆیەتی، نەک لەژێر چەپۆکی هێزی میلیشیایی توندئاژۆی حەشدی شەعبی و پەکەکەدا بێت، ئەمە جگە لەوەی لە بنەڕەتدا پەکەکە لایەنێک نییە نە لە هەرێمی کوردستان و نە لە عێراقیش، بەڵکو رێکخراوێکی باکووری کوردستان و وڵاتی تورکیایە“.
حەمێ جەختیش دەکاتەوە ”پەکەکە مافی ئەوەی نییە دەستێوەردان لە کاروباری هەرێمی کوردستاندا بکات، یان دژی بڕیارەکانی بوەستێتەوە، میوانێکی رەزاقوڕسە و پێویستە هەرێمی کوردستان جێبێڵێ و بگەڕێتەوە باكووری كوردستان کە ساڵەهایە لەژێر دەستی داگیرکاریی تورکیا دەناڵێنێ و بەشە هەرە گەورەکەی نەخشەی کوردستانە“.
دەشڵێ ”هەرێمی کوردستان قەوارەیەکە لەسەر ئاستی ناوچەیی و نێودەوڵەتیدا دان پێدانراوە و حکوومەت و پەرلەمان و هێزی پێشمەرگە و دامەزراوەی تایبەت بە خۆی هەیە و پێویستە رێز لە یاساکانی بگیرێ“.
حەمێ بەم پەرەگرافە کۆتایی بە وتارەکەی دێنێ و دەنووسێ ”ئەوەی پەکەکە ئەمڕۆ لە راگەیاندنی خۆیدا بڵاوی دەکاتەوە، دەستێوەردانە لە کاروباری هەرێم و گەلەکەی، ئێمە لای خۆمانەوە سەرکۆنەی ئەو هەڵمەتە دوژمنکارییانەی راگەیاندنی سەر بە قەندیل دەکەین، کە دژی هەرێمی کوردستان دەستی پێکردووە“.
