بەرپرسێكی حزبی ڕای دەگەیەنێت دۆخی سنووری قەزای دووبزی سەر بە پارێزگای كەركووك، ناجێگیرە و تیرۆریستانی داعش شەو و رۆژ لە جموجۆڵدان و بەهۆی کردەوە تیرۆریستییەکانەوە 20 گوندی كوردنشین چۆڵ كراون.
جەواد محەمەد، بەرپرسی ناوچەی دووبزی پارتی دیموکراتی کوردستان، ڕاگەیاند: “سنووری قەزای دووبز ئێستا لەڕووی ئەمنییەوە دۆخەکە ناجێگیرە و لە دوای خیانەتی 16ی ئۆكتۆبەری 2017ەوە پێشمەرگە لە سنوورەكە نەماوە و داعشیش پەرەی سەندووە و ئێستا چالاكییە تیرۆریستییەكانیان لە ناوچەكە بەو شەو رۆژیش ئەنجام دەدەن و هەندێك جار لە شەواندا دێنە ناوەندی قەزای دووبزیش و لە گوندەكانیش بە ئارەزووی خۆیان لە پێش چاوی خەڵك تەراتێن دەكەن”.
ئەو بەرپرسە، ئاماژەی بۆ ئەوەش كرد، لە ماوەی ئەم سێ ساڵەی رابردوو 20 گوندی كوردنشینی سنووری قەزای دووبز بەهۆی داعشەوە چۆڵ كراون و تەنیا چەند گوندێكی كەم ماوە كە خەڵكی تێدا ماوە و ئەو گوندانەش چەندین جار داعش هێرشی کردووەتە سەریان و خەڵكی شەهید و بریندار کردووە و تا ئێستاش دۆخەكە زۆر ناجێگیرە.
هاوکات لەگە جموجۆڵ و کردەوە تیرۆریستییەکانی داعش، میلیشیاکانی حەشدی شەعبی و عەرەبی هاوردە کە بۆ داگیرکردنی زەویوزاری جووتیاران دێنە سنوورەکە، هاووڵاتییانی کوردیان هەراسان کردووە.
