ژنانی چالاكی سلێمانی ئاماژە دەكەن، هەڵوێستەكانی رێواز فایەق، سەرۆكی پەرلەمانی كوردستان، دوورە لە كاری پەرلەمانی، بەو پێیەی سەرۆكی پەرلەمان و پەرلەمانتاران، دەبێت بێلایەنانە كارەكانیان بكەن و نەكەونە ژێر بڕیاری حزبەوە.
لانە محەمەد حافز، چالاكی بواری ژنان ،راگەیاند، كاتێك كە پەرلەمانتار سوێندی یاسایی دەخوات، نوێنەری گەلە بە هەموو چین و توێژەكانەوە، ڕاستە لەسەر لیستێكە، بەڵام پێویستە سیاسەتێكی حەكیمانە و دادپەروەرانە و بێلایەنانە پێڕەو بكات، دوور لە نەفەسی حزبی و شارچیەتی لە پێناو خزمەتكردنی كۆمەڵگا.
زیاتر گوتی، ئافرەت لە هەر پلە و پۆستێك بێت، جا سەرۆك پەرلەمان بێت یان پەرلەمانتار، ئەندامی مەكتەبی سیاسی بێت یان سەركردایەتی، وەزیر بێت یان بەڕێوەبەری گشتی، گەر نموونەیەكی سەركەوتوو پێشان بدا، ڕێگە خۆشكەرە و هەنگاوی پتەوە بۆ كردنەوەی دەرگا لەبەردەم كۆمەڵێك ئافرەتی چالاك و سەركەوتووی ئەم كۆمەڵگایە.
