چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
لە چەند رۆژی رابردوودا پارتی دیموكراتی كوردستان، شاندێكی باڵای پێكهێناوە و سەردانی لایەنەكانی دەست پێ كردووە بەمەبەستی دروستكردنی كۆدەنگی لایەنەكان لەسەر ئاستی هەرێمی كوردستان و عێراق، بەتایبەتی لەو كاتەی لە هەڵبژاردنەكانی عێراق نزیك دەبنەوە.
پارتی دەیەوێ هەموو لایەنەكان یەكدەنگ و یەكهەڵوێست بن تا بەرانبەر بەغدا بە بەهێزی دەربكەون و بتوانن بڕیاری یەكلاكەرەوە و گرنگ بدەن. بۆ ئەو مەبەستەش لەسەر هەڵبژاردنەكانی داهاتووی عێراق قسە كراوە كە لایەنە كوردییەكان بە یەك لیست بەشداری بكەن لە ناوچە جێناكۆكەكان.
خەسرەو گۆران بەپرسی دەزگای هەڵبژاردنی پارتی دیموكراتی كوردستان، راگەیاند، پارتی بۆ هەڵبژاردنی داهاتووی عێراق پڕۆژەی هەیە كە لە ناوچە جێناكۆكەكان بە یەك لیست بەشداری بكەن لە پێناو نەسووتانی دەنگی كورد و كۆكردنەوەی دەنگی كورد، چونكە زۆر گرنگە كورد لەو ناوچانە بە یەك لیست بەشداری بكات.
لە هەڵبژاردنەكانی رابردووشدا هەمیشە پارتی دیموكراتی كوردستان دەستپێشخەری كردووە تا لایەنەكان لەو ناوچانە بە یەك لیست بەشداری هەڵبژاردنەكان بكەن، بەڵام ئەو لایەنانە ئامادەییان پێشان نەداوە و كورد لەو ناوچانە كەمینە بووە و دەنگی كورد سووتاوە.
