چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
هاوكات لەگەڵ بەردەوامیی تەنگژەی دارایی لە هەرێمی كوردستان، بەهۆی پەتای كۆرۆنا و لێكەوتەكانی بە دابەزینی نرخی نەوت و كەمبوونەوەی داهاتی ناوخۆیی، جیا لە هەوڵەكان بۆ دابینكردنی مووچەی فەرمانبەران، كاروانی ئاوەدانكردنەوەی كابینەی نۆیەمی حكوومەتی هەرێم بەردەوامە و لە هەڵەبجە چەندان پڕۆژە لە جێبەجێكردندان.
كاوە عەلی، جێگری پارێزگاری هەڵەبجە،ڕاگەیاند، 10 پڕۆژەی ڕێگاوبان لە سنووری پارێزگای هەڵەبجە كەوتوونەتە بواری جێبەجێكردنەوە، لەوانە قیركردنی ڕێگای مەرزی شۆشمێ- تەوێڵە، و چاككردنەوەی ڕێگای سەیرانگای ئاوێسەر.
زیاتر گوتی، لە سنووری پارێزگای هەڵەبجە چەندان ڕێگا چاك دەكەینەوە لە چوارچێوەی هەشت پڕۆژە، ئاماژەی كرد، پڕۆژەكانی ڕێگاوبان بودجەیان ملیارێك و 300 ملیۆن دینارە، لە مانگی تشرینی یەكەمی ئەمساڵەوە كەوتوونەتە بواری جێبەجێكردنەوە.
جێگری پارێزگاری هەڵەبجە ئاماژەی بە پڕۆژەی تەلاری بەڕێوەبەرایەتی هاتوچۆی هەڵەبجە دا و گوتی، لەسەر ڕووبەری 12 دۆنم زەوی و لەسەر بودجەی هاتوچۆ خۆی جێبەجێ دەكرێ و ئێستە كاركردن تیایدا بەردەوامە و بودجەكەیشی چوار ملیار دینارە.
