ئەندامێكی پەرلەمانی كوردستان گواستنەوەی نایاسایی زێڕی لە لایەن بەرپرسێكی باڵای ئەمنی و دەستڕۆیشتووی سلێمانی ئاشكرا كرد.
سەعید هەركی جێگری سەرۆكی لێژنەی دەسپاكیی پەرلەمانی كوردستان رایگەیاند كە بەرپرسێكی باڵای ئەمنی و دەستڕۆیشتووی سلێمانی، بە فڕۆكەیەكی تایبەت و لە ڕێگەی بەشی VIPی فڕۆكەخانەی سلێمانییەوە بە شێوەیەكی نایاسایی و دوور لە تۆمارە فەرمییەكان، زێڕی بازرگانانی هەرێمی كوردستان و ئەو زێڕەی بە نایاسایی لە ئێران و باشووری عێراقەوە دێت، بۆ توركیا دەگوازێتەوە و بە پێچەوانەشەوە خشڵ و زێڕی ئامادەكراو هاوردە دەكات.
تەنانەت ئەوەشی ئاشكرا كردووە كە زێڕەكە لە ڕێگەی فڕۆكەیەكی تایبەتییەوە دەگوازرێتەوە، لە كاتی گەیشتنی فڕۆكەكەدا سەرجەم فەرمانبەرانی فڕۆكەخانەی نێودەوڵەتیی سلێمانی لە شوێنی فڕۆكەكە دوور دەخرێنەوە و تەنیا تیمێكی تایبەتی سەر بەو گرووپە دەمێنێتەوە.
ئەو ئەندامەی لێژنەی دەسپاكیی پەرلەمان، جەختی لەوە كردووەتەوە كە لە ماوەیەكی نزیكدا بەدواداچوونێكی ورد لەمبارەیەوە دەكەن و ئەنجامەكەی بۆ ڕای گشتی دەخەنەڕوو.
سەرچاوەیەكی تایبەتەوە ، ئەو بەرپرسە ئەمنییەی سلێمانی كە زێڕ و خشڵەكان بە نایاسایی دەگوازێتەوە، پۆڵاد جەنگی فەرماندەی دژە تیرۆری یەكێتیی نیشتمانیی كوردستان و برای لاهوور جەنگییە، لە كاتی جێبەجێكردنی پرۆسەی گواستنەوەكەش، تیمێكی تایبەتی سەر بە پۆڵاد جەنگی دەچنە نێو فڕۆكەخانەی سلێمانی و تا بەڕێكردنی فڕۆكە تایبەتەكە، ئەركی ڕاییكردنی كاروبارەكانی شوێنەكانی دەوروبەری فڕۆكە تایبەتەكە لە ئەستۆ دەگرن