ئەمڕۆ چوارشەممە مەسرور بارزانی سەرۆکی حکوومەتی هەرێمی کوردستان پێشوازی لە رۆب وۆڵەر کۆنسوڵی گشتیی نوێی ئەمەریکا لە هەرێمی کوردستان کرد.
لە دیدارەکەدا بارودۆخی عێراق و ناوچەکە و پەیوەندییەکانی نێوان هەرێمی کوردستان و ئەمریکا تاوتوێ کرا.
سەرۆکی حکوومەت پیرۆزبایی دەستبەکاربوونی لە کونسوڵی گشتیی نوێی ئەمەریکا کرد و هیوای سەرکەوتنی لە ئەرکەکانی بۆ خواست لە پێناو پەرەپێدانی زیاتری پەیوەندییەکانی نێوان هەرێمی کوردستان و ئەمەریکا.
سەرۆکی حکوومەت هەروەها پیرۆزباییشی لە ستیڤن فەیگن کۆنسوڵی پێشووی ئەمریکا لە ھەرێم کرد بە بۆنەی ئەرکی تازەی لە باڵوێزخانەی ئەمریکا لە بەغدا و هیوای سەرکەوتنی بۆ خواست.
کۆنسوڵی گشتیی ئەمریکا ئاماژەی بە گرنگیی بەهێزبوونی پەیوەندییەکانی ئەمریکا لەگەڵ عێراق و هەرێمی کوردستان کرد، ئامادەیی وڵاتەکەشی دەربڕی بۆ یارمەتیدانی هەرێمی کوردستان لە گەشەپێدانی ئابووریدا، بە تایبەتی لە بواری وزە و کشتوکاڵدا.