چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
میدیاكانی سەر بە تاقمی خیانەتی ١٦ی ئۆكتۆبەر، هەواڵێكیان بڵاو كردۆتەوە گوایە توركیا پیلانگێڕییەك لە دژی سلێمانی جێبەجێ دەكات كە پیلانەكەش ئەوەیە، چەكدارانی پەكەكە بچنە ناوچەكانی قەڵاچۆڵان و قەرەداغ.
لە بەرامبەردا رزگار عیسا سوار، ئەندامی فراكسیۆنی پارتی لە پەرلەمان،راگەیاند، ”خێرە لە لایەكەوە تاقمی خیانەتی ١٦ی ئۆكتۆبەر چوونی پەكەكە بۆ سلێمانی بە پیلانگێڕی وەسف دەكەن، لە لایەكی دیكەشەوە دەیانەوێ قەبووڵی بكەین پەكەكە هەر ڕۆژەی ناوچەیەكی سنووری هەولێر و دهۆك رادەستی توركیا بكات؟ ئەوان راست ناكەن لەو بانگەشە درۆیینەی بۆ دۆستایەتیی خۆیان لەگەڵ پەكەكە دەیكەن.
گوتیشی: ”پێشتر هەر ئەوانە كاتێك هەستیان كرد پەكەكە زۆر هاموشۆی ناوچەكەیان دەكات، خۆیان زانیارییان بە توركیا دا و لە چیای ئەزمەر بینیمان ژمارەیەك بەرپرسی پەكەكە تیرۆر كران“.
ئەوەشی وەبیر هێنایەوە كە هەمووی ساڵێك نابێت، یەكێتی هەڵمەتێكی فراوانی لە دژی پەكەكە لە سلێمانی و دەوروبەری ئەنجام دا و سەرجەم بارەگاكانی داخستن و تەنانەت خەڵكەكەیانی لە نێو ماڵی خۆیاندا بەند كرد.
