وەزیری ئاوەدانكردنەوەو نیشتەجێكردنی حكومەتی هەرێمی كوردستان لەپشكی گۆڕان، رایدەگەیەنێت:” ماوەی چەند رۆژێكە كۆمەڵێك سایت و پەیجی فەیسبوك بەدرۆ و بوختان دەیانەوێت ئەو خزمەتكردنەی وەزارەتی ئاوەدانكردنەوەو نیشتەجێكردن كە لەماوەی ساڵێك و دە مانگی رابردودا پێشكەشی خەڵكی كوردستانی كردوە، ناشرین بكەن.”
دانا عەبدولكەریم، لەروونكردنەوەیەكدا كەئەمڕۆ یەكشەممە بڵاویكردووەتەوە ئاماژەی بەوەكردووە:” ماوەی چەند رۆژێكە كۆمەڵێك سایت و پەیجی فەیسبوك كە خاوەنەكانیان دەیان ساڵە بەهۆی پێگەكانیانەوە خەریكی دزی و گەندەڵی و تاڵانكردنی سەروەت و سامانی ئەم وڵاتەن، بۆ چەواشەكاری هەواڵی ناراست و بێ بنەماو بوختان ئاراستەی ئێمە دەكەن.”
“وەك هەموان دەزانن، ئەركی ئێمە خزمەتكردنی هاوڵاتیانی كوردستانە بەبێ جیاوازی، ئەوانیش ئێستا بەدرۆ و بوختان دەیانەوێت ئەو خزمەتكردنەی وەزارەتی ئاوەدانكردنەوەو نیشتەجێكردن كە لەماوەی ساڵێك و دە مانگی رابردودا پێشكەشی خەڵكی كوردستانی كردوە، ناشرین بكەن.”
دانا عەبدولكەریم دەڵێت:”ئەوان درۆ و دراوەكانیان رون و ئاشكرابوەو دەزانین كوێیان دێشێت، بەڵام ئێمە وەڵامی ئەو درۆ و بوختانانەیان بەهەوڵ و خزمەت و پڕۆژە بەردەوامەكانمان دەدەینەوە كە ئێستا لە ناوچە جیاوازەكانی هەرێمی كوردستان كاریان تێدا دەكرێت.”