چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
لەماوەی دواییدا جارێكی تر سوپای عێراق گوشاری خستە سەر چەكدارانی سەر بە پارتی كرێكارانی كوردستان لە شنگال بۆ چۆڵكردنی سەنتەری شارەكە و رێخۆشكردن بۆ گەڕانەوەی خەڵكەكە و جێبەجێكردنی رێككەوتنی شنگال، بەڵام ئەوان تەحەدای سوپایان كرد، گوتەبێژی هۆزە عەرەبییەكانی ناوچە كێشەلەسەرەكان باسی دوایین پێشهاتی ئەو بابەتە دەكات.
موزاحم ئەحمەد حوێت، گوتەبێژ بەناوی هۆزە عەرەبییەكانی ناوچە كێشەلەسەرەكان راگەیاند، سوپای عێراق سەرەتای ئەم مانگەی بۆ چەكدارانی سەر بە پەكەكە دیاری كردبوو بۆ چۆڵكردنی شنگال، بەڵام ئەوان پابەندی داواكەی سوپا و حكوومەتی عێراق نەبوون، بە چۆڵكردنی شنگال و هەموو بارەگاكانیان لەوێ.
زیاتر گوتی، لێرەوە بۆمان دەركەوت كە ئەوانە رێكخراوێكی تیرۆریستین و گرنگی بە قسە و داواكاریی حكوومەتی عێراقی نادەن و هیچ بەهایەك بۆ ئەو حكوومەتە دانانێن، هەروەها بەڵگەیشە لەسەر ئەوەی پەكەكە هاوپەیمانە لەگەڵ میلیشیاكانی سەر بە ئێران، ئەوانن پاڵپشتی دەكەن و سەرچاوەی هێزیانن.
