چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
بەهمەن عەبدوڵا پەرلەمانتاری کوردستان لە فراكسیۆنی پارتی رای گەیاند ئیرادەی بەهێزی سەرۆکی حکوومەتی هەرێمی كوردستان و لە پشت ئەویشەوە ئیرادەی بەهێزی پارتی، جارێكی تر شکستی بە زۆر پیلانی گڵاو لە دژی هەرێمی کوردستان و قەوارە دەستورییەکەی لە پرۆژەیاسای بودجەدا هێنا.
پەرلەمانتارەكەی کوردستان لە هەژماری خۆیدا لە تۆڕی كۆمەڵایەتیی (فەیسبووك) نووسیویەتی “هەمووان بیرتانە کێ بوون ئەوانەی ئیمزای فەرمانبەرانی هەرێمی کوردستانیان کۆدەکردەوە و دەیانبرد بۆ بەغدا و دەیانگوت مووچەی فەرمانبەران با راستەوخۆ لەلایەن بەغداوە بدرێت، بۆ ئەوەی کۆتایی بە قەوارەی دەستووریی هەرێم بهێنن؟ هەمووان بیرتان ماوە کە کێ بوون ئەوانەی بە ناوی لامەرکەزی و تەعامولی راستەوخۆی پارێزگاکانی هەرێم لەگەڵ بەغدا، دەیانویست قەوارەی فیدراڵیی هەرێمی کوردستان پەرت پەرت بکەن؟”.
هەروەها دەپرسێ “هەمووان بیرتان ماوە کێ بوون ئەوانەی شەو و ڕۆژ لە کەناڵی کوردی و عەرەبی، لەلای دۆست و نەیار دژی هەرێمی کوردستان و سیاسەتی نەوتی هەرێم لێدوانیان دەدا و بە سیاسەتی فاشیل و نایاسایی ناویان دەبرد؟ داوایان دەکرد کۆی مەلەفی نەوت تەسلیمی بەغدا بکرێت تەنها بەغدا بەس مووچە بدات؟ حەتمەن هەمووانیش بیرتانە کێ بوون دەیانگوت وەفدی هەرێم لاواز و بێ دەسەڵاتە و سەرۆکی حکوومەت پشتیوانی ئەو وەفدە نیە، بەڵام ئێستا هەمووان دەبینن دوای پێداگیری سەرۆکی حکوومەت و ئیرادە بەهێزەکەی بۆ تەسلیم نەبوون بەو دەنگە نەشازانە و خۆ تەسلیم نەکردن بە داخوازیە نادەستوریەکانی بەغدا و ئیدارەدانی مووچە و خزمەتگوزارییەکانی هەرێم بەبێ پارەی بەغدا، چ دەسکەوتی گرنگی بەدەست هێنا و چۆن شکستی بەو پیلان و درۆیانەی سەرەوە هێنا”.
بەهمەن عەبدوڵا دەشڵێ “لە یاسای بودجەی فیدراڵیی عێراق مافە دەستوریەکانی هەرێمی کوردستان و قەوارەی فیدراڵیی هەرێم پارێزراو و چەسپا، هەموو جاش و نەیارانی هەرێمی بێ ئومێد و بێ هیوا کرد، مەلەفی نەوتی هەرێم نەک تەسلیم نەکرا، بەڵكو ئەوەی ئەوان پێیان دەگوت ناشەفاف و شکستخواردوو و نایاسایی، لە یاسای بودجە ئیعتیراف بە شەفافیەت و یاساییبوون و سەرکەوتنی سیاسەتی نەوتی هەرێمیش کرا، کە جگە لە پارتییەکان، کەس خۆی بە خاوەنی ئەو سیاسەتە نەدەکرد، بەڵام لەمڕۆ بەدواوە زۆر کەس خۆی دەکات بە خاوەنی. ئیرادەی بەهێز و جدیەتی مەسرور بارزانی لە پشت وەفدەکەی حکوومەت بۆ هەموو لایەکی سەلماند کێ راستی کرد و جدی بوو بۆ رێککەوتن و پاراستنی قەوارەی دەستووریی هەرێم، کێش بوون ئەوانەی هەموو رۆژ درۆیان بەگوێی خەڵکدا دەدا”.
پەرلەمانتارەكەی كوردستان لە كۆتاییشدا دووپاتی كردووەتەوە “کە ئیرادەی ماڵی بارزان هەبێت لە سیاسەت و کوردایەتیدا، هیچ شتێک مەحاڵ نییە، بۆیە بە هەموو نەیارانی پارتی و ماڵی بارزان دەڵێین ئێمە بەفر بین و ئێوەش خۆرەتاو، هەر دەبێت ئێوە بتوێنەوە”.
