چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
رێبین هەردی و عەلی باپیر !
فوئاد سدیق
ماوەی ٤ ساڵ زیاترە بە دەگمەن نەبێت سەیری تیڤییەكان ناكەم، بەڵام ئەمڕۆ برادەرێكی ئەزیزم خەبەری كردمەوە، كە ئایا ئەو دیمانەی رێبین هەردی چۆن لێكدەدەمەوە كە دەڵێت: لە ئێستادا هیچ هێزێك بەقەد كۆمەڵی ئیسلامی بە نوێنەری خۆم نازانم… ئەمە منی بردەوە سەر رەفتارەكانی كۆمەڵی ئیسلامی لە تەواوی وڵاتانی عەرەبی و ئینجا رەفتارەكانی كۆمەڵی ئیسلامی چ ئەوكاتانەی لەناو بزووتنەوەی ئیسلامی كە وەك مار كەپكەیان خواردبوو، هەر رۆژەو شەڕو گۆبەندێكیان بۆ بزووتنەوەی ئیسلامی دەهێنایەوە، چ گوفتارو رەفتارەكانی عەلی باپیر كە بەردەوام وەك پشكۆی ژێر خۆڵەمێش وابوونەو، لەگەڵ شنەبایەكدا پشكۆكان دەگەشانەوە. چونكە نابێت ئەوەمان لەبیر بچێتەوە، ئەوەی لە دوای راپەڕین بووە هۆكاری یەكەم بۆ هەڵگیرساندنی شەڕی ناوەخۆ، پارتی و یەكێتی نەبوون، بەڵكو عەلی باپیر بوو لە رانیە دایگیرساند، ئەمە مێژووە نابێ بشێوێندرێ، واتا یەكەم گوللە، یەكەم پریشكی ئاگری شەڕی ناوەخۆ كە هەڵگیرسا، ئەو تاقمەی ناو بزووتنەوەی ئیسلامی بوون لە رانیە، دایانگیرساند، ماوەیەك دوای ئەم شەڕە ، ئینجا شەڕی ناوخۆی یەكێتی و پارتی دروستبوو. ئەمە قسەی مەلا عەلی عەبدولعەزیزی رابەری بزووتنەوەی ئیسلامییە.
رێبین هەردی لە بنەماڵەی مامۆستا(ئەحمەد هەردی )نەبوایە، ئەو ناوبانگەی ئێستای نەدەبوو، زۆر كەس لەم هەرێمە هەن، زۆر لە كاك رێبین رۆشنبیرتر، نووسەرتر،بە بەرهەمتر، تێكۆشەرترو ماندووتریشن، بەڵام لەبەرئەوەی لە خانەوادەیەكی هەژارو جوتیارو داماوی ئەم هەرێمەن، گۆشەگیر كراون، یان هەر هیچ نەبێت، كەناڵە جۆراوجۆرەكانی راگەیاندن گرنگی پێنادەن، یان هەر خۆی حەز بە خۆدەرخستن و زۆر بڵێیی و ، وتنی ئینشائیات نەبێت …ئاخر من تا ئێستا هیچ بەرهەمێكی فیكری ئەوتۆم لە كاك رێبین نەبینیوە، تا روانینێكی فیكری و فەلسەفیم بەرانبەر بە نووسینەكانی هەبێت و ، ئیتر بۆچوونەكانیشی بە هەند وەربگرم، بەڵام لە بیرمان نەچێ رێبین هەردی و تەواوی كوڕو كچەكانی ئەحمەد هەردی، ناوبانگی باوكیان بە میرات وەرگرتووەوئەو ناوە جوانەی باوكیان بۆ خۆیان ئیستغلالیان كردووە بۆئەوەی بە دۆست و دوژمنانیان بڵێن ئێمەش لە بنەماڵەیەكی دیارین و هەین.. كە لە بنەڕەتدا بوونی ئەوان هیچ كاریگەرییەكی نە لە بواری مەعریفی، نە لە بواری سیاسی، نە لە بواری حوكمڕانیدا نەبووە.ئەم چەند دێڕەشم تەنیا لەبەر ئەوە نووسیوە، هەندێك لە خەڵكی رەشۆكی رەنگە پێیانوابێت قسەكانی رێبین گرنگی خۆی هەیە،بۆیە ئەم وەڵامە كورتەم بۆ نووسیوە. كە بە داخەوە نییەتی.
ناچمە سەر كۆمەڵەی ئیسلامییەكانی وڵاتانی عەرەبی، كە چ كارەساتێكیان ناوەتەوە، چونكە كارەساتەكان بەقەد هەزارو یەكشەوە زیاترن. بەڵام لە كاك رێبین دەپرسم ئایا جیاوازییەك لە ئەقڵیەتی شەهیدكردنی فەرەج فۆدەو شەهیدكردنی جەمال عیرفاندا هەیە؟ ئەگەر هەیە چییە؟ بۆمانی روونبكەوە. ئەوەی ساداتی شەهید كرد، لەگەڵ ئەوەی فرەنسۆ هەریری شەهید كرد، جیاوازییەكانیان لە كوێدایە؟.قەت لە عەلی باپیرت پرسیوە، لەنێوان دیموكراسی و شورادا، كامیان هەڵدەبژێری؟ ئەگەر لێشت نەپرسیوە، خۆ دەبێت چەند كتێبێكی مەلا عەلی باپیرت خوێندبێتەوە، خۆ لەو كتێبانەیدا زۆر بە روونی دژی دیموكراسی وەستاوەتەوە، بەم پێوەرە بێت تۆش نابێ بڕوات بە دیموكراسی هەبێت، ئەگینا چۆن دەیكەی بە نوێنەری خۆت… دەمەوێ ئەوەشت لێ بپرسم چ هێزێك هەیە لە سەرتاسەری ئەم جیهانە، بەقەت گرووپە ئیسلامی و سەلەفییەكانی وەك كۆمەڵی ئیسلامی و داعش و رێكخراوی قاعدەو…هتد كۆسپ بن لەبەردەم مۆدێرنە، پێتوانییە گەورەترین مەترسی كە تێكەڵ بە سیاسەت بووبێت، ئەوەبووە كە ئایینیان تێكەڵ بە سیاسەت كردو لەو رێگایەشەوە دەیان حزبی بەناو ئیسلامی دروستكران و سیاسەتیان بەتەواوی شێواند؟ .
بە راستی شەرمە كەسێك خۆی بە خوێنەوار بزانێ، كابرایەكی سەلەفی توندڕەو بكات بە تاكە نوێنەری راستەقینەی خۆی. ئەمە عەیبەیەكی زۆر گەورەیە.چونكە پێویستە كاك رێبین ئەوەمان بۆ روون بكاتەوە، عەلی باپیر لە چەندین كتێبی خۆیدا دژی دیموكراسی و خەباتی نەتەوەیی و خەباتی پەرلەمانی وەستاوەتەوە، هەر ئەوانیش بوون دژی سروودی ئەی رەقیب هەڵنەستانە سەر پێیان، پرسیارەكە ئەوەیە تۆ بەم هەموو پۆخلەواتییەوە عەلی باپیرو كۆمەڵی ئیسلامی بە نوێنەری خۆت دەزانی، كە فڕیان بەسەر هەستی نەتەوەیی چەندین ملیۆن كورددا نەبووە. تۆ بڵێی عەلی باپیر لە نووسینەكانی خۆی هەڵگەڕابێتەوەو پەشیمان بووبێتەوە؟، ئەگەر هەڵگەڕاوەتەوەو پەشیمانبوونەوەی خۆی راگەیاندووە، كوا؟ فەرموو دەقێكی نووسینی ئەومان پێ نیشان بدە، ئەگەر پەشیمانیش نەبۆتەوە لە نووسینەكانی پێشووی، تۆ بە چ لۆجیك و پێوەرێك دەیكەی بە نوێنەری خۆت، ئاخر ئێستاش باسی خەونبینینەكانی خۆی دەكات، جارێكیان كە چۆتە ناو بزووتنەوەی ئیسلامی بۆ هەڵخەڵەتاندنی سەركردایەتی بزووتنەوەو، جارێكی تریش لەكاتی گرتنەكەی لەلایەن ئەمریكییەكانەوە. سەیرە رێبین هەردی بڕوای بەمجۆرە خەونانە هەبووبێت، ئاخر ئەمە یەكێكە لە سەیرو سەمەرەكانی جیهان … دوور لە تۆ قسەیەك هەیە دەڵێت كەری دێزە لە رقی خاوەنەكەی، خۆی هەڵدەدێرێت، دیسان دەڵێم دوور لە تۆ، تۆ كەسێكی هەر چۆنێك بووبیت خوێنەواری ، چۆن ئەوجۆرە كەسایەتییە بە نوێنەری خۆت دادەنێی ؟.
باشتر دەبوو، پێش ئەوەی بڕیارێكی لەمجۆرە بدەی كە كێ بە نوێنەری خۆت دەزانی، هەندێك لە كتێبەكانی ئەو نوێنەرەت خوێندبایەوە، كە شارستانیەتی رۆژئاوا بە فەسادی ئەخلاقی دادەنێت (بەڵام كوڕەكەی خۆی ناردۆتە ئەوێ و لەوێ ژیان بەسەر ببات و ڤیدیۆی جوانیشی لەوێ هەیە!) ،بیری نەتەوایی بە میكرۆب و زەلكاوی ئیمپریالی و سەرمایەداری ناودەبات و دەڵێت(لە هەموو شتێك پیسترو كاریگەرتر بۆ پەرتەوازە كردنی موسڵمانان و پارچە پارچەكردنی نیشتمانی ئیسلامی و سستكردنی پەیوەندی برایەتی نێوان گەلانی ئیسلامی بریتی بوولە(ناسیۆنالیزم)نەتەوە پەرستی ).لە كتێبێكی تریدا دەڵێت:بیری نەتەوایەتی-ناسیۆنالیزم- دژی ئیسلامەو پێچەوانەی ژیری و (منطق)یشە….هتد. عەلی باپیر هەر بەوەندە نەوەستاوە باسی كێشەی ئیسلام و نەتەوەو ماركسیزممان بۆ بكات، بە داخەوە فڕی بەسەر هیچیانەوە نییە، بەڵكو هاتووە، لە كتێبێكی دیكەیدا، مرۆڤی كورد لەقالب دەدات و بە بۆچوونە سەقەتەكەی ئەو، ئەو پیاوانەی ریشی سمێڵان دەتاشن، بە یەكجاری سیماو نیشانەی پیاوەتی بە خۆیانەوە ناهێلن!. بەراستی كاك رێبین ئەمەیە نوێنەرەكەی تۆ؟!.
حەزدەكەم بۆم روونبكەیتەوە عەلی باپیر بۆ یەكجار تەنیا یەكجار بڕوای بە یەكسانی كۆمەڵگا هەبووبێت، بەڵام من دەیان نموونە لە نووسینەكانیت بۆ دەهێنمەوە، ئەقڵی ئافرەت بە كەمتر لە هی پیاو دەزانێت، پاساوەكەشی ئەوەیە پێغەمبەرەكان هیچیان ژن نەبوونە. بۆیە پیاوێك چەندین ژن دەهێنێت، وەك نوێنەرەكەشت وای كردووە، ئەو مافەیان لێدەسێنێتەوە.
باشە بۆچی جارێك لەو نوێنەرەی خۆت نەپرسیوە، بۆچی رێكخراوی تیرۆریستی داعشت تەكفیر نەكرد؟ بۆچی جارێك لێت نەپرسی لێرەوە بۆ محەمەد مورسی خۆپیشاندانتان دەكردو داوای ئازادكردنیتان دەكرد، بەڵام جارێك لەسەر پێشێلكردنی مافە نەتەوەییەكانی كورد خۆپیشاندانێكتان نەكرد، جارێك لەسەر سنووربەزاندنی وڵاتانی هەرێمی بە بەغدایشەوە، خۆپیشاندانێكتان نەكرد،نوقەیەكتان لێوە نەهات. بۆچی هیچ پرسیارێكی لەمجۆرانەت لێ نەكردووە؟ جارێك لەو نوێنەرەت نەپرسی ئاخر تۆ سوننە مەزهەبی و كۆمەڵی ئیسلامیش مەزهەبگەرای سونەیە، ئەی چۆن ئێران هاوكاریتان دەكات كە مەزهەبی شیعە گەراییە؟ ئەو بەیەكگەیشتنەی دەسەڵاتی شیعەگەرایی ئێران بە ئێوەی سونە مەزهەبگەرا، لەسەر چ بنەمایەكە؟ ئەگەر بۆ تێكدانی هەرێمی كوردستان نەبێت چ خوێندنەوەیەكی تری بۆ دەكرێت؟ باشە كە هیچت لێی نەپرسیوە ئەی چۆن بە نوێنەری خۆتی دەزانی؟ ئەم نوێنەرایەتییە لەسەر چ بنەمایەكە؟ ئایا كۆمەڵی ئیسلامی جیهاد بە ئەركی خۆی نازانێ؟ كێ بوون تیزابیان بە ئافرەتدا دەكردو كتێبخانەیان دەتەقاندەوە؟ ئەوانەی كتێبخانەی هەنگاویان تەقاندەوە، چ جیاوازییەكی هەیە لەگەڵ ئەوانەی دژی دەرهێنانی فیلم و ئەكتەرەكانی میسر وەستانەوە لە سەردەمی مورسی دا؟ ئەوانەی تیزابیان بە جەستەی ئافرەتاندا دەكرد، چ جیاوازییەكیان هەیە لەگەڵ ئەوانەی لە موسڵ بە چەكوش كەوتنە سەر تێكشاندنی پەیكەرە دێرینەكانی ئەو شارە كە گەورەترین كاری هونەری و سەرمایەی ئەم شارو وڵاتە بوون. كاك رێبین نموونەكان گەلێك زۆرن، هیچ عەیبەیەكیش نییە، روونكردنەوەی پێویست بدەیت لەسەر ئەو بابەتەو لێی پەشیمانبیتەوە كە سەلەفییەكی توندڕەو بكەی بە نوێنەری خۆت، ئاخر ئەو بەڕێزە دەسەڵاتی نییە، كەچی دژی سمێڵ تاشینی پیاوانە، ئەی دەسەڵاتی هەبێت لە داعش خراپتر بەو خەڵك و نیشتمانە دەكات!.
دوا قسەم ئەوەیە، خەڵكێكی یەكجار زۆر كە قسە لەسەر دەسەڵات و حكومەت دەكەن، هەمیشە بەیەك ریتم و بە یەك شێوە باسی پارتی و یەكێتی دەكەن، لەراستیدا ئەمە هەڵەیەكی گەورەیە، مانای تێنەگەیشتنە لە حزبی سیاسی لە پێكهاتەی حزبایەتی ، تێنەگەیشتنە لە ئەزموونی نیو سەدە لە خەباتی سیاسی و نیشتمانی ، ئینجا تێنەگەیشتنە لە زانستی سیاسی. چونكە پارتی و یەكێتی دوو حزبی تەواو لەیەك جیاوازن، ئەم جیاوازییە لە گوفتارو رەفتاریاندا رەنگیداوەتەوە، هەرگیز ناتوانن بگەن بە یەك.ئەگەر خەڵكی نەخوێندەواریش ئەو جیاوازییانە نەزانێت، نابێت كەسانی خوێنەوارو نووسەر پێی نەزانن.
