عەلی عەونی، ئەندامی سەركردایەتیی پارتی لە نووسینێكیدا بە ناونیشانی (گێچەڵی پەكەكە) كە لە پێگەی خۆی لە تۆڕی كۆمەڵایەتیی (فەیسبووك) بڵاوی كردۆتەوە، ئاماژەی بەو ڕاگەیاندراوە كردووە كە چەند نووسەر و بەناو ڕۆشنبیرێك لە سلێمانی بڵاویان كردۆتەوە و رای گەیاندووە: ”بەناو ڕۆشنبیر و خۆ بە دڵسۆزنانان لە جیاتی ئەوەی داوا بكەن شەڕ لە نێوان حكوومەتی هەرێمی كوردستان و پەكەكە ڕوو نەدات، پێویستە داوا بكەن پەكەكە دەست لە پروپاگەندە و گێچەڵكردن بە دامودەزگا شەرعییەكانی حكوومەتی هەرێمی كوردستان هەڵبگرێت و چەكدارەكانی بباتە توركیا و هەوڵبدات دەڤەری ڕزگاركراو لە باكووری كوردستان دروست بكات و گەریلاكانی لەوێ چالاكی بۆ ئازادكردنی شار و گوندە داگیركراوەكان بكەن“.
بە ڕاشكاوانەش ئاشكرای كردووە، ئەگەر پەكەكە دەیەوێت لە باشووری كوردستان بمێنێتەوە، پێویستە ملكەچی هەموو یاساكانی هەرێمی كوردستان بێت و دان بە شەرعیەتی دامودەزگاكانی حكوومەتی هەرێمی كوردستاندا بنێت“.
عەلی عەونی جەختی كردۆتەوە، لە باشوری کوردستاندا یەک ھێز شەرعییە و رێگە پێدراوە چەکدار بێت، ئەویش ھێزی پێشمەرگەی کوردستانە، ”ھێزی پێشمەرگەی کوردستان ئازادە لە ناو سنوورە فەرمییەکانی باشووری کوردستان لە ھەر شوێنێک بە پێویستی بزانێت، بارەگای ھەبێت و جووڵە بکات“.
هۆشداریشی داوە كە هێزەكانی پەكەكە ”بەبێ مۆڵەت وەرگرتن لە لایەنە فەرمییەكان و دەسەڵاتی هەرێمی كوردستان، مافی هاتوچۆیان نییە، چ جای ئەوەی بازگە بۆ وەرگرتنی باج و خاوە و سەرانە دابنێن“.
ئەمە لە كاتێكدایە كە ڕۆژی ٢٨ی ١٠ی ٢٠٢٠، پەكەكە بۆڕیی گواستنەوەی نەوتی هەرێمی كوردستانی بۆ بەندەری جەیهان لە نێو سنووری دەوڵەتی توركیا كردە ئامانج و پاشان بە فەرمی رای گەیاند كە بۆڕییەكەیان تەقاندۆتەوە. دواتریش رۆژی چوارشەممە ٤ی ١١ی ٢٠٢٠ بۆمبێكی چێندراوی پەكەكە بە ئۆتۆمبێلی پێشمەرگەدا تەقییەوە و هاوكات لەگەڵ تەقینەوەی بۆمبەكەش، چەكدارانی پەكەكە لە چەند لایەكەوە تەقەیان لە هێزی پێشمەرگەی كوردستان كرد.