ئەمڕۆ پێنجشەممە باڵوێزخانەی توركیا لە بەغدا هۆشدارییەكی بڵاو كردەوە و داوای لە خەڵكی عێراق كرد منداڵەكانیان نەنێرنە قوتابخانەكانی فەتحوڵا گولەن ڕێبەری بزوتنەوەی خزمەت لە توركیا.
باڵوێزخانەكە ئاماژەی بەوە داوە كە پێویستە كەس منداڵەكانی نەنێرێتە قوتابخانەكانی فەتحوڵا گولەن لە ناوچە جیاوازەكانی عێراق، چونكە قوتابخانەكان سەر بە ڕێكخراوی تیرۆریستیین.
هەروەها دووپاتی كردووەتەوە هەر قوتابییەك لەو قوتابخانانەی گولەن دەربچن، ئەوا لە زانكۆكانی توركیا بە هیچ شێوەیەك جێگەیان نابێتەوە و وەرناگیرێن.
جێی باسە بە پێی ئامارێكی میدیا عێراقییەكان، ئێستا لەم وڵاتەدا 44 قوتابخانە و زانكۆیەكی سەر بە ڕێكخراوی فەتحوڵا گولەن هەن.