چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
ئەندامێکی پەرلەمانی کوردستان لە فراکسیۆنی پارتی دیموکراتی کوردستان رای گەیاند لە ماوەی رابردوودا، پروشكەكانی کێشەکانی ناوخۆی یەکێتی، بەر حکوومەت کەوتوون، دەشڵێ ئهوهی یهكێتی لە ماوەی رابردوودا کردی، چەواشهكاری سیاسی و ههڵهیهكی كوشنده بوو.
وەیسی سەعید پەرلەمانتاری كوردستان لە وتارێكدا لە هەژماری خۆی لە (فەیسبووك) بڵاوی كردووەتەوە، نووسیویەتی: “لە دەستپێکی دەستبەکاربوونی کابینەی نۆیەمی حکوومەتی ھەرێمی کوردستان، بەرێز مەسروربارزانی ھەوڵی زۆری دا حکوومەتی ههموو خەڵکی کوردستان بێت، لە زاخۆ تا خانەقین به بیروبۆچوونی جیاوازەوه، هیچ دهستێكی حزبی و كهسی نهیهته ناو کارەکانیەوه، بۆ ئهوهی بە باشترین شێواز خزمهتی خهڵك بکرێت، بەڵام بەھۆی کێشەکانی ناوخۆی یەکێتی، بۆ بەلاڕێبردنی ململانێکانیان، پڕوشکەکانی بەر حکوومەت کەوتووە و رێگرییەکی زۆر کرا، لەپێناو بەرژەوەندییەکانیان دەستیان خستە ناو کاروباری حکوومەت، ھەر زوو ههندێك كهس خۆیان کردە بەدیلی حکوومەت و، رێگر بوون لهوهی به یهك شێواز حوكمی یاسا و رێنماییهكان جێبهجێ بكرێن، لە جیاتی حکوومەت و لەبری یاسا و پۆلیس و ئاسایش بریار دەدەن و تەداخول لە ورد و درشت دەکەن.”
دەشڵێ: “ئەگەر یەکێتی لە حکوومەتیش نەبوایە و ئۆپۆزسیۆن بووایە، هەر هێندەی ئێستا دژی حکوومەت کاریان دەکرد، لە کاتێکدا دەبوایە پاڵپشت و پشتیوانی کارەکانی حکوومەتی کردبا، چونکە لەبەرکەوتەی خۆی زیاتر پۆستی پێدراوە نەک بەم شێوازەی ئێستا مامەڵە بکات و گرفت بۆ دامودەزگاکانی حکوومەت دروست بکات، بەتایبەت لە کۆکردنەوەی داهاتی ناوخۆدا”.
وەیسی سەعید ئەوەشی نووسیوە كە ئهوهی یهكێتی لە ماوەی رابردوودا کردی، چەواشهكاری سیاسی و ههڵهیهكی كوشنده بوو بۆ خودی گیانی خۆی، دەمێکە ئەم سیاسەتەیان شکستی ھێناوە، خەڵکی کوردستان ھۆشیارە و راستییەکان دەزانێت چۆنە و چی دەکرێت، بۆچی گرفت لەبەردەم کار و پرۆژە خزمەتگوزارییەکانی حکوومەت دروست دەکرێت.
دووپاتیشی كردووەتەوە كە دوایین پەیامی سەرۆکی حکوومەتی هەرێمی کوردستان لەبارەی دۆخی هەرێمی کوردستان، گرنگ و پێویست بوو، پەیامی دەوڵەتمەداریی و ھەستکردن بە بەرپرسیارییەتی بوو، چیتریش نەدەکرا ھەروا بێدەنگ بێت و موجامەلەی سیاسی بکات، خەڵکی کوردستان دەمێکە بەدوای وەڵامی ئەو پرسیارانەوە بوو، کە زۆر راشکاوانە وەڵامی دانەوە و،پەنجەی خستە سەر گشت کەموکورتییەکان، لێرە بەدواوە گرنگە خەڵکی کوردستان خۆیان بریار بدەن.
