چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
بریکاری وەزارەتی ئاوەدانکردنەوەی حکوومەتی ھەرێمی کوردستان گوتی، بڕیارە لەم ھەفتەیە رێکاری دەستپێکردنی دیراسەکردنی پڕۆژەی دروستکردنی ھێڵی ئاسنین لە ھەرێمی کوردستان لەلایەن کۆمپانیایەکی ئیسپانی تەواو بکرێت و دەست بەکارەکانیان بکرێت و لەمساڵدا کاری دیراسەکردنی پڕۆژەکە تەواو بێت.
ئاگرین عەبدوڵڵا ڕایگەیاندووە : “لە ئێستادا خەریکی پڕۆژەی دروستکردنی ھێڵی ئاسنین کە گرێبەستمان لەگەڵ کۆمپانیایەکی ئیسپانی کردووە بۆ ئەوەی دیراسەی پڕۆژەکەمان بۆ ئەنجامبدات و چاوەڕێ دەکەین ھەندێک کێشەی خیتاب زەمانی ھەبوو بۆمان بێت و دەست بەکاربین و ئێمەش لە وەزارەتی ئاوەدانکردنەوە تیمێکمان دروستکردووە و ھەماھەنگی لەگەڵ ئەوان بکات و سەرپەرشتی کارەکان بکات”.
بریکاری وەزارەتی ئاوەدانکردنەوەی حکوومەتی ھەرێمی کوردستان ڕوونیشیکردەوە: “ئێمە فشارمان لەسەر ئەوان کردووە، کە پەلە بکەن لەکارەکان و بڕیارە خیتاب زەمانی بێنن و پارەیان بۆ بنێردرێت بە سیستەمی بانکی و لەگەڵ وەزارەتی دارایی خەریکین و لەم ھەفتەیە کارێک دەکرێت و رێکارەکان تەواو دەبن”.
ئاگرین عەبدوڵڵا ئاماژە بەوەشدەکات: “ئەوان کاری خۆیان ئەنجامداوە و ھەندێک راپۆرتیان ئامادە کردووە لەگەڵ تەواوکردنی رێکاری یاسایی و دارایی و بڕیارە کارەکانی دیکەش بکرێت، ھەروەھا وتیشی، دیراسەکە نۆ مانگی پێویستە و چاوەرێ دەکرێت ئەمساڵ پێش ئەو ماوەی بۆیان دیاریکراوە تەواوبکرێت”.
