ژیل دو کرچۆڤ، بەرپرسی بەشی رووبەڕووبوونەوەی تیرۆری یەکێتیی ئەوروپا ئاماژە بەوە دەکات، پێویستە ئامانجی سەرەکیی حکومەتی وڵاتان رووبەڕووبوونەوەی کۆرۆنا و رێگەگرتن لە کاریگەرییە ئابوورییەکانی بێت، بەڵام دەبێت حکومەتەکان بابەتە ئەمنییەکانیش لەبەرچاوبگرن، لەوانەش ئەگەری توڕەیی خەڵک بەهۆی قەدەخەی هاتووچۆ و خراپبوونی بواری ئابووری، کە دەکرێت ئەوانیش ببنە هۆی رادیکاڵبوون و تەنانەت چەکداربوونی خەڵک.
بەرپرسی بەشی رووبەڕووبوونەوەی تیرۆری یەکێتیی ئەوروپا گوتیشی، لە رۆژانی داهاتوودا راپۆرتێک دەداتە وڵاتانی ئەندام لە یەکێتیی ئەوروپا و تێیدا باس لە نیگەرانییەکانی دەکات، لەوانەش ئەو راپۆرتانەی باس لەوە دەکەن کە گرووپە راستڕەوەکان بە ئۆنلاین نامە بۆ یەکتری دەنێرن و داوا لە یەکتری دەکەن بچنە دەرەوە و هێرش بکەنە سەر “دوژمنان”.
ژیل دو کرچۆڤ دەشڵێ، بڵاوبوونەوەی کۆرۆنا لەکاتێكدایە، رێکخراوی داعش و گرووپەکانی دیکەش هەوڵدەدەن پێگەی خۆیان لە سووریا، عێراق و بیابانەکانی ئەفریقا بەهێزبکەنەوە، چونکە حکومەتەکان لەو ناوچانە تەواوی هەوڵی خۆیان خستووەتەگەڕ بۆ رووبەڕووبوونەوەی کۆرۆنا و دابەزینی نرخی نەوتیش کاریگەریی گەورەی لەسەریان دروستکردووە.
یەکێک لەو وڵاتانەی مەترسیی بەهێزبوونەوەی داعشی تێدایە، عێراقە؛ لە چەند مانگی رابردوودا داعش جموجووڵەکانی لە ناوچە کوردستانییەکانی دەرەوەی ئیدارەی هەرێمی کوردستان و چەند ناوچەیەکی دیکە زیادکردووە و بەرپرسانی باڵای هەرێمی کوردستان و ژمارەیەک ناوەندی توێژینەوە و شرۆڤەکاریش هۆشدارییان لە بەهێزبوونەوەی داعش داوە.