حکوومەت لە ڕێگەی وەزارەتی کشتوکاڵەوە خەریکی ئامادەکردنی پلانی کشتوکاڵیی ئەمساڵە و بریکاری وەزارەتەکەش دەڵێت، تەواوکردنی بەنداوەکان لە دەستپێکی کارەکانی حکوومەتە بۆ سوودوەرگرتن لە بارانی ئەمساڵ.
حوسێن حەمە کەریم، گوتەبێژی وەزارەتی کشتوکاڵ، ڕاگەیاند: “وەزارەتی کشتوکاڵ خەریکی ئامادەکردنی پلانی کشتوکاڵیی ئەمساڵە و بەڕێوبەبەرایەتیی گشتیی پارێزگاکان، پلانی پڕۆژەکانیان ناردووە بۆ وەزارەت و داوای پێداچوونەوە بەرز دەکرێتەوە بۆ سەرۆکایەتیی ئەنجومەنی وەزیران و، لەلایەن سەرۆکایەتیی ئەنجومەنی وەزیرانەوە بڕیار لەسەر ئەو ژمارەیە دەدرێت کە ئەمساڵ دەچێتە بواری جێبەجێکردنەوە.
گوتەبێژی وەزارەتی کشتوکاڵ دەشڵێت: “دەمانەوێت ئەمساڵ زیاتر گرینگی بە بەنداوەکان بدەین، بەتایبەتی دوای چەند شەپۆلێکی بەفر و باران، چونکە سوود لە گلدانەوەی ئاوی باران وەردەگرین بۆ وەرزەکانی داھاتوو، ھەتا ساڵی داھاتووش.”
حوسێن حەمە کەریم ئاماژەی بۆ ئەوەش کرد: “ژمارەیەک بەنداوی نوێ لە کوردستان دروست دەکرێن کە ژمارەیان نۆ بەنداوە و ھەندێ بەنداوی دیکەش ھی ساڵانی ڕابردوون، ئەوانیش تەواو دەکرێن کە سەرجەمیان نزیکەی ١٦ بەنداو دەبێت.