عیرفان عەلی عەبدولعەزیز رابەری گشتی بزووتنەوەی ئیسلامی كوردستان، بۆ یەکخستنی ناوماڵی ئیسلامییەکان،سەردانی عەلی باپیر سەرۆكی كۆمەڵی دادگەری دەكات، دواتر سەردانی سەڵاحەدین بەهائەدین ئەمینداری گشتی یەكگرتووی ئیسلامی دەكات.
عەبدولقادر حاجی توێژەر و شارەزایی كاروباری حزبە ئیسلامییەكان، ڕاگەیاند، هەوڵ بۆ یەكخستن و یەكدەنگی لەلایەن حزبە ئیسلامییەكان بۆ كۆتایی ساڵی 2017 دەگەڕێتەوە، كاتێك تا ئاستێكی باش ڕۆیشت، بەڵام ئەنجامی هەڵبژاردنەكان و زیادبوونی كورسیی لایەنێك لەناو ئیسلامییەكان، ئەو هەوڵە شكستی هێنا.
زیاتر گوتی، ئێستەیش ئەگەر بە ئاستی بەدەستهێنانی كورسی مامەڵە لەگەڵ یەك بكەن، ئەوا بێگومان ئەو هەوڵەش شكست دەهێنێت و ئیسلامییەكان ناتوانن بۆ ماوەی یەك مانگیش لە چوارچێوەیەكی دیاریكراو بمێننەوە.
حزبە ئیسلامییەكانی هەرێمی كوردستان، یەكگرتووی ئیسلامی و كۆمەڵ و بزووتنەوەی ئیسلامی، لە ساڵی 2017دا هەوڵیان بۆ پێكهێنانی بەرەیەكی ئیسلامی لە هەرێمی كوردستان هەبوو، بەڵام شكستی هێنا.