چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
مەسرور بارزانی، سەرۆکی حکومەتی هەرێمی کوردستان، ئەمڕۆ شەممە (2ی ئۆکتۆبەری 2021) پێشوازی لە میر حازم تەحسین بەگ، میری ئێزدییان و بابەشێخ، شێخ عەلی شێخ ئەلیاس کرد.
لە دیدارەکەدا، سەرۆکی حکومەت پابەندبوونی حکومەتی هەرێمی کوردستانی بە خزمەتکردنی زیاتری ئێزدییان دووپاتکردەوە، کە وەک هەمیشە پشتیوان و داکۆکیکاری بەهێزی مافەکانیان دەبێت. جەختیشی لەوە کردەوە کە حکومەتی هەرێم هەموو هەوڵێکی خستووەتەگەڕ بۆ ئەوەی بە هاوکاری و هەماهەنگیی حکومەتی فیدراڵی و کۆمەڵگەی نێودەوڵەتی، شنگال ئاوەدان بکرێتەوە و ئاوارەکان بە سەربەرزی بگەڕێنەوە بۆ شوێنەکانیان.
میر و بابەشێخی ئێزدییان، وێڕای ئاماژەدان بە گرنگیی جێبەجێکردنی رێککەوتننامەی شنگال و ئاساییکردنەوەی دۆخی ناوچەکە، سوپاسی سەرۆکی حکومەتیشیان کرد بۆ رەزامەندیدانی لە سەر، کۆمەڵێک پڕۆژەی خزمەتگوزاری بۆ ناوچەکانیان، لەوانە، کردنی هەردوو کۆمەڵگەی خانکێ و شاریا بە ناحیە، ئەمەش لە چوارچێوەی گۆڕانکارییە ئیدارییەکان لە سنووری پارێزگای دھۆک.
