
دیدارێکی تایبەت لە نێو تاریکیی زینداندا: لاهوور شێخ جەنگی پەردە لەسەر نهێنییە گەورەکان هەڵدەداتەوە.
لاهوور شێخ جەنگی: ئەگەر ڕۆژێک لە زیندان بێمە دەرەوە، کاتی ئەوە دێت سەرکردایەتیی یەکێتی بڕۆن.
لە دیدارێکی تایبەتدا لە ڕێگەی پارێزەرەکانییەوە بۆ ماڵپەڕی «چرکە»، لاهوور شێخ جەنگی، سەرۆکی زیندانیکراوی ڕەوتی بەرەی گەل، وردەکاریی دۆخی زیندان، دادگاییکردن و داهاتووی پەیوەندییەکانی لەگەڵ یەکێتی ئاشکرا کرد.
چرکە: دۆخ و ڕۆژانی نێو زیندان؟ لاهوور شێخ جەنگی:
- ١٤ مانگ لە زیندانی تاکەکەسیدا: سەرەتا زۆر سەخت بوو، بەڵام دواتر ئاسانتر بوو.
- بەسەربردنی کات: زیاتر بە خوێندنەوە و دوای ١٢ مانگ بە نووسینی هۆنراوە و یاداشت بەسەری بردووە، هاوکات دوای ٣٠ ساڵ دابڕان دەستی بە وێنەکێشان کردووەتەوە.
- مامەڵەی نێو زیندان: دەڵێت تەنیا لە ڕۆژی یەکەمی دەستگیرکردندا لێکۆڵینەوەی لەگەڵ کراوە و تا ٨ مانگ و ڕۆژی دادگاییکردن قسەی لەگەڵ نەکراوە و بە تەنیا جێهێڵدراوە.
چرکە: دادگاییکردن لە سلێمانی لەبری هەولێر؟ لاهوور شێخ جەنگی:
- ڕایگەیاندووە متمانەی بە سیستمی دادگا لە سلێمانی نەماوە و ٩٩٪ـی دادوەرەکان بە سیاسی دانراون و فەرمان لە قوباد و بافڵ تاڵەبانی وەردەگرن.
- پێی وایە ڕێگری لە گواستنەوەی دۆسیەکەی بۆ دادگای پێداچوونەوە لە هەولێر کراوە، چونکە بەڵگەکان لەوێ ناچەسپێن و بەرگە ناگرن.
چرکە: داهاتووی پەیوەندی لەگەڵ یەکێتی؟ لاهوور شێخ جەنگی:
- جەختی کردووەتەوە کێشەی لەگەڵ بنکەی جەماوەریی یەکێتیدا نییە، بەڵام کارکردن لەگەڵ سەرکردایەتیی ئێستای یەکێتی بە سەخت دەزانێت.
- گوتی: «جێگەیەک بۆ ئێمە نییە و تەنیا یەکێکمان دەتوانین بمێنینەوە. لە ئێستادا لە زیندانم، بەڵام ئەگەر ڕۆژێک بێمە دەرەوە، کاتی ئەوە دێت ئەوان بڕۆن.»





























