چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
مایەی خۆشحاڵییە كە ئەمڕۆ پرۆژەیەكی دیكەی پیشەسازی لە هەرێمی كوردستان دەكەینەوە. دەستخۆشی لە گرووپی (گەلیاوە) دەكەم بۆ ئەنجامدانی ئەم كارە گرنگە كە بە ستانداردێكی جیهانی و بەكارهێنانی پێشكەوتووترین تەكنەلۆژیا دروست كراوە.
كردنەوەی ئەم كارگەیە ڕۆڵێكی گرنگی دەبێت لە بەرەوپێشبردنی كەرتی پیشەسازی لە كوردستان و رەخساندنی هەزاران هەلی كار بۆ گەنجانی كوردستان. جێی دەستخۆشییە كە كارگەكە پابەندبوونی خۆی بە لەبەرچاوگرتنی بنەماكانی پاراستنی ژینگە و بەردەوامیی ژینگەیی دەربڕیوە. ئەمەش لە ڕێگەی بەكارهێنانی شێواز و تەكنیكی پێشكەوتوو كە دۆستی ژینگەیە.
حكوومەتی هەرێمی كوردستان لە چەند ساڵی رابردوودا بە هاوكاریی لەگەڵ كەرتی تایبەت، پلان و بەرنامەی گرنگی هەبووە بۆ بایەخدان بە كەرتی پیشەسازی، بە تایبەتی لە بوارەكانی پیشەسازیی خۆراك و پترۆكیمیایی و كانزاكان و دابینكردنی ماددەی خاو بۆ پیشەسازیی بچووك و مامناوەند و دروستكردنی چەند ناوچەیەكی پیشەسازی لە شارەكانی هەرێمی كوردستان كە چەند ڕۆژێكیش لەمەوبەر بەردی بناغەی ناوچەیەكی پیشەسازیمان لە سنووری ئیدارەی زاخۆ دانا و كردنەوەی ئەم كارگەیەش بەشێكە لە هاوكاری و هەماهەنگیی حكوومەت و كەرتی تایبەت لە پێناو پێشخستنی ژێرخانی كشتوكاڵی لە هەرێمی كوردستان.
بەڕێزان وێرای چەندین گرفت لە ساڵانی رابردوو، لەم ماوەیەدا چەندین پرۆژەی گەورەمان لە هەموو شار و شارۆچكەكانی كوردستان دەست پێكرد، لە بوار و كەرتی جۆراوجۆر كە زۆربەیان ئێستا كەوتوونەتە خزمەتی خەڵكی كوردستان. ئامانجی ئێمە ئەوەیە كە ژێرخانێكی بەهێزی ئابووری لە كوردستان دروست بكەین بۆ ئەوەی ژیانی خەڵكی كوردستان باشتر بكەین و نەوەی داهاتووش بتوانێت لەسەر پێی خۆی بوەستێت.
