چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
سەرۆكی حكوومەتی هەرێمی كوردستان پێشوازی لە شێخ مەحموود حەفید زادە، كەسایەتی دەڤەری سلێمانی و وەزیری پێشووتری ئەوقاف كرد، لە دیدارەكە سەرۆكی حكوومەت دووپاتی كردەوە كە سەرەنجام ئیرادەی خۆڕاگری گەلی كوردستان سەردەكەوێ و پیلانگێڕییەكان شكست دەخۆن و خۆشگوزەرانی و شادمانی دەگەڕێتەوە.
وەك شێخ مەحموود حەفید زادە، نەوەی شێخ مەحموودی حەفید، كە ماوەیەك لە حكوومەتی هەرێم وەزیری ئەوقاف بووە، لە لاپەڕەی خۆی لە فەیسبوك نووسیویەتی، پاش نیوەڕۆی ئەمڕۆ 13/8/2023 لە هاوینەهەواری (سەری بڵند)، بە دیداری مەسروور بارزانی، سەرۆكی حكوومەتی هەرێمی كوردستان شاد بوووین.
وەك باسی كردووە، لەو دیدارەدا گفتوگۆمان لەبارەی رەوشی ناوخۆی هەرێمی كوردستان و هەوڵەكانی حكوومەتی هەرێم بۆ چارەسەری تەنگژە و كێشەكان كرد، هەروەها لەبارەی چەند پرس و بابەتێكی جیاواز بیروڕامان گۆڕیەوە، لە تەوەرێكی دیدارەكەدا جەنابیان دووپاتیان لە ستراتیج و سیاسەت و كارنامەی حكوومەتی هەرێمی كوردستان كردەوە كە هەموو هەوڵ و تواناكانی خستووەتە گەڕ لە پێناوی چارەسەری بنەڕەتی گشت كێشەكان و خۆشگوزەرانیی هاووڵاتییانی كوردستان و سەركەوتنی گەلەكەمان.
شێخ مەحموود ئاماژە دەكات، لە دیدارەكە سەرۆكی حكوومەتی هەرێم دووپاتی كردەوە كە سەرئەنجام ئیرادەی خۆڕاگری گەلی كوردستان سەردەكەوێ و پیلانگێڕییەكان شكست دەخۆن، خۆشگوزەرانی و شادمانی دەگەڕێتەوە و دۆخی گوزەرانی هاووڵاتییان بەم شێوەیەی ئێستە نامێنێتەوە.
