چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
دەستەی رێکخستنی پەیوەندییەکانی روسیا رایگەیاند، بڕیاردراوە هەردو تۆڕی کۆمەڵایەتی فەیسبوک و تویتەر لەناو خۆی وڵاتدا قەدەغە بکرێن، هۆکارەکەشی بۆ ئەوە گەڕاندوەتەوە کە هەردو پێگەکە جیاوازی دەکەن لەنێوان کارکردنی میدکانی روسیا و رۆژئاوا، بەجۆرێک روماڵی میدیاکانی نزیک لەمۆسکۆیان سنوردار کردوە.
دەستەی رێکخستنی پەیوەندییەکانی روسیا ئەمڕۆ هەینی لەراگەیەنراوێکدا باسی لەوەشکردوە، هەردو پێگەی فەیسبوک و تویتەر چاودێرییەکی زۆر توندییان خستوەتەسەر ئەو هەواڵ و بڵاوکراوانەی روانگەی روسیا و رەفتاری پێچەوانەی وڵاتانی رۆژئاوا دەگوازنەوە، بۆیە مۆسکۆش بڕیاری داوە هەردو پێگەکە لەناو روسیادا قەدەغە بکات.
بڕیارەکەی روسیا تەنها ئەو دو پێگەیەی نەگرتوەتەوە، بەڵکو کەناڵی بی بی سی، DW و ژمارەیەک پێگەی دیکەش لەو وڵاتەدا کارکردنیان قەدەغە کراوە.
ئەوەش لەکاتێکدایە لەسەرەتای هێرشەکەی روسیا بۆ سەر ئۆکرانیا، وڵاتانی رۆژئاوا ژمارەیەک رێکاریان دژی میدیاکانی روسیا گرتەبەر و کارکردنیان سنوردار کردن لەوانەش گروپی کەناڵەکانی RT و سپوتینگ، بەهۆکاری ئەوەی دیمەنی روداوەکان وەک خۆی ناگوازنەوە و کاردەکەن بۆ رەوایەتیدان بە هێرشەکەی مۆسکۆ.
