چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
گوتەبێژی حزبی سۆسیالیست دیموكراتی كوردستان رای دەگەیەنێت كە حكوومەتی هەرێم بە بڕیاری مۆڵەتپێدان بە سەرۆكی نەوەی نوێ، كە بەهۆی موزایەدەكانییەوە دەنگی هەندێك لە هاووڵاتییانی بەدەست هێنا، هەر زوو ئەوەی پێشانی هاووڵاتییان دا كە ئەوانە موزایەدە دەكەن نەك خزمەت.
بەختیار كەریم، گوتەبێژی حزبی سۆسیالیست دیموكراتی كوردستان ،راگەیاند، لەكاتی هەڵبژاردنەكانی پەرلەمانی عێراق، لایەنێك بە هۆی موزایەدەكانییەوە توانی دەنگی هەندێك هاووڵاتی بەلای خۆیدا رابكێشێت، بەڵام لە دوای پرۆسەكەوە دەركەوت ئەو لایەنە، كە نەوەی نوێیە، سەرۆكەكەی كاری موزایەدەیە، بەڵام هەر زوو حكوومەتی هەرێمی كوردستان، كە جێگەی دەسخۆشییە، ئەو موزایەدەی راگرت بە بڕیارەكانی.
زیاتر گوتی، بڕیارەكەی حكوومەتی هەرێمی كوردستان بە پێدانی مۆڵەت بە شاسوار جێگەی دەستخۆشی بوو كە دەرگای واڵا كرد بۆ ئەوانەی دەیانەوێت كاری باش بكەن، بەڵام دەركەوت ئەو كەسە تەنیا قسە دەكات، حكوومەتیش ئەوەی پێشانی هاووڵاتییان دا كە چیتر هیچ كەسێك بە قسەو بڕیارەكانی ناتوانێ موزایەدە و چەواشەكاری بكات بەسەر خەڵكەوە.
گوتەبێژی حزبی سۆسیالیست باسی لەوەیش كرد، كەسێك ئەگەر بیەوێ خزمەت بە هاووڵاتییان بكات، دەبێت بە كردار خزمەت بكات، نەوەی نوێش ویستی بەو جۆرە وا پێشانی بدات كە لەگەڵ هاووڵاتییاندایە، بەڵام بۆی نەچووە سەر.
