به‌په‌له‌: هه‌وڵی تیرۆر كردنی دكتۆره‌ باخان چڕبووه‌ته‌وه‌ له‌لایه‌ن به‌رپرسێكی ئه‌منی یه‌كێتی

دكتۆره باخان ئازاد، ڕای ده‌گه‌یه‌نێ كه‌ به‌رپرسێكی ئاسایشی سلێمانی هه‌ڕه‌شه‌ی كوشتنی لێ كردووه‌ و دووپاتی ده‌كاته‌وه‌ هه‌وڵی تیرۆركردنی ده‌ده‌ن، به‌ڵام ئه‌و هه‌ڕه‌شانه‌ له‌ ئاشكراكردن و باسكردنی دۆسیه‌ی گه‌نده‌ڵی ساردی ناكاته‌وه‌.

دکتۆرە باخان ئازاد، ڕاگەیاند، دوای ئاشکراکردنی چەندان دۆسیەی گەندەڵیی بەڕێوبەرایەتی تەندروستیی ھەڵەبجە، ڕووبەڕووی ھەڕەشەی کوشتن بوومەوە، ئێستاش ھەوڵی تیرۆکردنم دەدەن و ئەوانەشی کە ھەوڵی تیرۆرکردنم دەدەن كەسانێكی ناسراون و لە ڕێگەی تەلەفۆنەوە كه‌سێك بە ناوی (س) لە ھۆبەی ئۆپەراسیۆنی ئاسایشی یەکێتی، ھەڕەشەی کوشتنم لێ دەکات.

گوتیشی، بەھۆی ئەو ھەڕەشانەوە ژیانم لە مەترسیدایە، بەڵام “ھیچ ترس و تۆقاندن و چاوسوورکردنەوه‌یەک ساردم ناکاتەوە و پشتم بە خوای گەورە و خەڵکی بەشەرەفی سلێمانی و ھەڵەبجە بەستووە و لەسەر ئەو ھەڕەشانە سکاڵام تۆمار کردووە و ئەگەر ڕووبەڕووی ھەر حاڵەتێکی نەخوازراو ببمەوە، یەکێتی بەرپرسیارە لەژیانی خۆم و منداڵەکانم.

دکتۆرە باخان ئازاد، ئاماژەی بەوەش کرد، تەندروستیی ھەڵەبجە لە گەندەڵیدا نقووم بووه‌ و جام کە پڕ بوو لێی دەڕژێت، ئەو ھەموو ناھەقیەی بەرچاوم دەکه‌وێت، یژدانم ڕێگەم پێنادات لە ئاستیدا بێدەنگی ھەڵبژێرم، بۆیە لە پێناو دادگەری لە ناو کەرتی تەندروستی و بەدەستھێنانی دڵنیایی بۆ ھاوڵاتییانی ھەڵەبجە، بەردەوان دەبم تا گەندەڵی لە کەرتی تەندروستیی ھەڵەبجە بنبڕ دەکرێت.