چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
پەرلەمانتارێکی پارتی لە پەرلەمانی کوردستان تەواوی مووچەکەی بەسەر 53 ماڵی هەژاردا دابەش کرد و ئەو بەڵێنەی کە لە سەروەختی هەڵبژاردن بە خەڵک و دەنگدەرانی دابوو بردە سەر.
هەڵکەوت لالە ئەنوەر، پەرلەمانتاری فراکسیۆنی پارتی لە پەرلەمانی کوردستان، کە لە شوێنی ئومێد خۆشناو بووە پەرلەمانتار، رایگەیاند: “من وەک پەرلەمانتاری کوردستانی، هەڵکەوت لالە ئەنوەری خەلیفە یونس ئەمرۆ وەک یەکەم پەرلەمانتاری پارتی دیموکراتی کوردستان بەڵێنەکەم بۆ پشتگیریی و یارمەتیدانی ماڵە هەژارو بێ نەوایان، بەجێ دێنم و یەکەم موچەی پەرلەمانتاریەکەم دەبەخشمە کۆمەڵێک ماڵە هەژار بەبێ جیاوازی حزبی و ئایدۆلۆژیی”.
دەشڵێت: “راستە موچە، ئیمتیازات و مافی رەوای هەر پەرلەمانتارێکە، بەڵام ئاسودەکردنی دڵی هەژاران و پۆشتەکردنی منداڵێکی بێ نەوا بۆ من و هاوڕێکانم گەورەترین ماف و ئەرک و ئیمتیازە بە شانازییەوە”.
هەروەها ئەو پەرلەمانتارەی پارتی ئەو بەڵێنەی کە لە سەروەختی پروپاگەندەکانی هەڵبژاردن بە خەڵک و دەنگدەرانی دابوو بردەسەر و ئەمرۆ لە شارۆچکەی زەڕایەن بە ئامادەبوونی کەناڵەکانی راگەیاندن و پیاوماقوڵان، کۆی مووچەی ئەم مانگەی بەسەر 53 ماڵە هەژار و کەمدەرامەتی ناوچەکە دابەشکرد.
ئەوەشی خستووەتە روو، کە هەر مانگەی لە ناوچە و دەڤەرێک مووچەی مانگەکانی ترم دابەش دەکەم بۆ هەژاران و ساڵانەش یارمەتیدانی لاوان بۆ هاوسەرگیریی دەگرمە ئەستۆ، ئەمەش بەشێکە لەو بەڵێن و کارنامە پەرلەمانیەی کاندیدانی پارتی دیموکراتی کوردستان کە بڕیارە بۆ هەمیشە لە خزمەتی خەڵک و چینی هەژاراندا بین.
