بەرهەم ساڵح، سەرۆك كۆماری عێراق لە وتاری لەبەردەم پاپای ڤاتیكان باسی لە رۆڵی هێزە عێراقییەكان كرد لە پاراستنی مەسیحییەكان لە داعش، بەوەیش رۆڵی گرنگ و قوربانیدانی پێشمەرگەی فەرامۆش كرد، فەرماندەیەكی زێرەڤانی دووپاتی دەكاتەوە كە پێشمەرگە بوو مەسیحییەكانی پاراست.
لیوا روكن رەشید عەبدولكەریم عەبدولقادر، فەرماندە لە هێزەكانی پێشمەرگەی زێرەڤانی، راگەیاند، پاپا و هەموو دنیا دەزانن كە پێشمەرگە بوو بەرگری لە مەسیحی و تەواوی نەتەوە و ئاینەكانی تر لە تیرۆرستانی داعش كرد و ئەوانی پاراست.
زیاتر گوتی، خۆم بەرپرسی تەواوی ئەو ناوچانە بووم لە تەلەسقوف، بۆیە یەكەم خەتی پاراستنی بەرگری لە ئێزیدی و مەسیحی و شەبەك و نەتەوە و ئاینەكان، پێشمەرگە بوون، من ئامر لیوای دووی هێزی پێشمەرگە لە فەرماندەی فەرماندەیی هێزی زێرەڤانی بووم لە سەهلی نەینەوا، گیانی تەواوی هاووڵاتییان و شوێنە ئاینییەكانی ئەو سنوورانەمان پاراست.
“هێزی پێشمەرگەی كوردستان ئەو ناوچانەی گرتەوە، ئەوكات هێزەكانی عێراق هاتن بۆ شەڕی مووسڵ، ئەو شوێنانەی پێشمەرگە دەیان پارێزێت، بوونەتە لانكەی ئارامیی بۆ پێڕەوانی ئاینی مەسیحی و ئێزیدی، نموونە تەلەسقوف و قەرقووش و دەوروبەری چیای زەردەش لەژێر دەسەڵاتی پێشمەرگەن و هاووڵاتییەكانی بە ئارامی دەژین، دەبێت ئەو پێڕەوانی ئاینیانەیش باس لەوە بكەن پێشمەرگە سەروماڵی پاراستوون و كەشێكی ئارامی بۆ دابین كردوون”، ئەو فەرماندە وای گوت.
دووپاتی كردەوە، هەر كەس لە ناوەندە فەرمییەكانی عێراق لەكاتی باسكردنی هێزەكانی عێراق بۆ پاراستنی خاك و خەڵكەكەی و ئاماژە بە رۆڵ و قوربانیدانی پێشمەرگەی كوردستان نەدات، ئەوە تەعدا لە پێشمەرگە دەكات.