چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
خانەنشینکردنی ھێزەکانی پێشمەرگە دەستی پێکردووە و بەرپرسێکی وەزارەتی پێشمەرگەش دەڵێ، دوو مەرج ھەن بۆ خانەشینکردنی ھەر پێشمەرگەیەک، یان خزمەتی زۆری ھەبێت یانیش تەمەنی گەیشبێتە وادەی یاسایی.
لیوا بابەکر فەقێ ئەحمەد، بەڕێوەبەری گشتی راگەیاندنی وەزارەتی پێشمەرگە، راگەیاند: “بەرنامەی چاکسازی لە وەزارەتی پێشمەرگە دەستی پێکردووە و ئەو پێشمەرگانەی تەمەنیان گەیشتووتە خانەنشینی لەڕووی یاسایەوە خانەنشین دەکرێن، پڕۆسەکە ھەردوو یەکەی حەفتا و ھەشتای ھێزی پێشمەرگەش دەگرێتەوە، واتە ئەو پێشمەرگانەی سەربە ھەردوو یەکەن و تەمەنیان گەیشتووتە رێژەی یاسایی دەتوانن خۆیان خانەشین بکەن.
بەرپرسەکەی وەزارەتی پێشمەرگە گوتیشی: “ئەوانەشی خزمەتیان لە ١٥ ھەتا ٢٠ ساڵە لەنێو ڕیزەکانی ھێزی پێشمەرگەدان و تەمەنیان نەگەیشتووتە ڕێژەی یاسایی ئەوانیش خانەنشین دەکرێن، بەڵام کەمێک لە مووچەکانیان کەمدەکرێتەوە.
لیوا بابەکر فەقێ ئەحمەد روونیشی کردەوە: “دوو مەرجی سەرەکی ھەن بۆ پێشمەرگەیەک بۆ خانەشینکردن یان تەمەنی یاسایی یانیش خزمەتی ھەبێت، بەڵام ئەوانەی خزمەتیان ھەیە و تەمەنیان نەگەیشتووتە خانەنشینی ئەوە بەزۆری نیە دەتوانن ئارەزوومەندانە داواکاری بۆ خانەنشینکردن پێشکەش بکەن.
