چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
چەندین بەڵگە دەیسەلمێنێ کە پارتی کرێکارانی کوردستان (PKK) و دەستی دەرەکی دەستیان لەو ئاژاوەگێڕییەی سنووری سلێمانیدا هەیە. چاودێرێکی سیاسییش جەخت لەسەر ئەوە دەکاتەوە کە پەکەکە لە یەکەم کابینەی حکوومەتی هەرێمی کوردستانەوە بووە بە بەڵا بەسەر خەڵکەوە و پەلاماری هەرێمی کوردستانی داوە.
سیروان حەمەشەریف، چاودێری سیاسی لە سلێمانی، گەیاند، هۆکارەکانی ئەو دۆخەی لە سلێمانی دروست بووە زۆرن و هەر بۆشاییەک لە هەرێمی کوردستان هەبێت، دەستی دەرەکی و نەیارانی تێدەكەوێت. گوتیشی: ”نەیارەکانی هەرێمی کوردستان زۆرن و قسەکردنی هەندێ پەرلەمانتار و سیاسی کە هەرێمی کوردستان داهاتی زۆر زیاترە لە مووچەی فەرمانبەران، کاریگەریی هەبووە لەسەر جووڵاندنی شەقام و دواتر شەقام بە ئاراستەی خراپ و دەستی نەیارانی تێكەوتووە“.
ئاماژەی بەوەش دا، پەکەکە لە یەکەم کابینەی حکوومەتی هەرێمی کوردستان بووەتە بەڵا بەسەر هەرێمی کوردستانەوە و خۆی وەکوو نەیارێک لە دژی حکوومەتی هەرێمی کوردستان نیشان داوە، گوتیشی: ”مافی هەرێمی کوردستان بووە لە رووی یاسای نێودەوڵەتییەوە کۆتایی بە کێشەی پەکەکە لەسەر خاکەکەی بهێنێت، چونکە ناکرێ هێزێک لەسەر خاکی وڵاتێکی دیکە هەبێت بۆ لێدان لە بەرژەوەندییەکانی وڵاتانی دراوسێ“.
