دۆناڵد ترەمپ سەرۆكی ئەمریكا لە جریوەیەكدا لە تۆڕی كۆمەڵایەتی تویتەر نووسیویەتی، بایدن بردییەوە، ئەمەش بە هۆی ئەوەی لە هەڵبژاردندا ساختەكاری كراوە.
ترەمپ ئاماژەی بەوەشكردووە، “تەنانەت ڕێگەیان بە چاودێرانی كۆمارییەكان نەداوە بچنە شوێنی جیاكردنەوەی دەنگەكان و كۆمپانیای ئەهلی دۆمینیۆنیش كە ئەركی جیاكردنەوەی دەنگەكانی پێسپێردرابوو، سەر بە كەسێكی چەپی توندڕەوە”.
سەرۆكی ئەمریكا دواتر لە جریوەیەكی تردا ڕایگەیاندووە، هیچ شتێكی قبوڵنەكردووە و سازش ناكات، بایدن تەنها لە چاوی میدیای ساختەوە سەركەوتووە، نوسیویشیەتی، “ڕێگەیەكی دوورمان لەپێشە، ئەنجامی هەڵبژاردن دزراوە”.
لەدوای هەڵبژاردنی 3 ی تشرینی دووەم و جیاكردنەوەی دەنگەكان ترەمپ بە بەردەوامی باسی لە ساختەكاری لە پڕۆسەكەدا كردووە و تائێستا ئامادە نییە بە فەرمی سەركەوتنی ڕكابەرەكەی قبوڵ بكات.