چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
سەرۆكی پەرلەمانی كوردستان بە توندی وەڵامی سەرۆكی فراكسیۆنی كۆمەڵی ئیسلامیی كوردستان دەداتەوە و قسەكانی بە چەواشەكاری ناودەبات.
بە گوێرەی ڕوونكردنەوەیەك كە لە ماڵپەڕی فەرمیی پەرلەمانی كوردستاندا بڵاو كراوەتەوە، نووسینگەی سەرۆكی پەرلەمانی كوردستان رای گەیاندووە، په‌رله‌مانتار عه‌بدولستار مه‌جید له هه‌ندێك ده‌زگای راگه‌یاندن و سۆشیال میدیا “چەواشەكاری” كردووە، به‌وه‌ى كه گوایه سه‌رۆكی په‌رله‌مان داوای لێكردووه سه‌باره‌ت به لێبڕینی ٢١%ى مووچه‌ی فه‌رمانبه‌ران، به‌ڵگه بهێنێته‌وه.
لە بەرامبەردا جەخت كراوەتەوە كە ڕێواز فایەق بە نووسراوی فەرمی وەڵامی یاداشتێكی داوەتەوە و جگە لەوە “تەنانەت بە تەلەفۆنیش لەگەڵ عەبدولستار مەجید قسەی نەكردووە، شێوازی كاری ئێمە فەرمییە و بە نووسراوە”. هەروەها نووسراوەكە پاڵپشت بووە بە ماددەكانی ٦٨، ٦٩ و بڕگەی یەكەمی ماددە ٧٠ و بڕگەی چوارەم و پێنجەمی ماددە ٧٤ی پەیڕەوی ناوخۆ بووە.
سەرۆكی پەرلەمان ئەوەی وەبیر سەرۆكی فراكسیۆنی كۆمەڵ هێناوەتەوە كە “سەرۆكی پەرلەمان ڕێگە بە خۆی نادات لەپێناو ڕازیكردنی هیچ كەسێك، یاداشتێكی پڕ لە كەموكوڕیی یاسایی و پەیڕەوی ئاراستەی ئەنجوومەنی وەزیران بكات و دواتر بە نووسراو ئەو هەموو هەڵە و كەموكوڕییە بۆ پەرلەمان بگەڕێندرێتەوە و والێكبدرێتەوە كە سەرۆكی پەرلەمان ئاگاداری دەقەكانی پەیڕەوی ناوخۆ نین، بۆیە هەرچی پێویست بێت لە پەرلەمان چاك دەكرێتەوە”.
لە كۆتاییشدا داوای لە عەبدولستار مەجید كردووە، “لە جیاتی ئیستفزازكردنی خەڵك و تاوانباركردن و پەلاماردان و چەواشەكاری، جیارێكی دیكە لە چوارچێوەی پەیڕەوی ناوخۆی پەرلەمان یاداشتەكە ئامادە بكاتەوە”.
