فەرید ئەسەسەرد، سكرتێری ئەنجومەنی سەركردایەتی یەكێتی نیشتمانی كوردستان، ئاماژە بە ئاساییبوونەوەی پەیوەندییەكانی حزبەكەی لەگەڵ پارتی دەكات و دەڵێت: بەستەڵەكی نێوانیان تواوەتەوە.
فەرید ئەسەسەرد ، رایگەیاند: بڕیارێكی گشتی لەناو یەكێتیدا هەبووە بۆ ئەوەی گرژییان لەگەڵ پارتی نەمێنێت، یەكێك لە هاوسەرۆكان دەستپێشخەریی كرد و پرۆسەكە سەركەوتوو بوو.
وتیشی: بناغەیەك دانراوە بۆ ئاساییكردنەوەی پەیوەندییەكانی نێوان پارتی و یەكێتی، ئەو بەستەڵەكە گەورەیەی هەبوو تواوەتەوە”.
لەبارەی بوونی بۆچونی جیاواز لە دوای كۆنگرە لە ناو یەكێتیدا، ئەسەسەرد دەڵێت: هیچ حزبێكی ئاسنین و بێ تەكەتول نیە ئەوە شتێكی زۆر ئاساییە، پێشتر یەكێتی جیاواز بووە لە هێزەكانی تر و دەسەڵاتەكانی لامەركەزی بوون، بۆچونی جیاواز لە ناو یەكێتیدا هەر لە سەرەتاوە رێی پێدراوە.