چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
بە بڕیاری پارێزگاری كەركووك به وه‌كاله‌ت، سێ بەرپرسی دیكەی كورد كە بریتین لە قایمقامی ناوەندی كەركووك و قایمقامی دووبز و بەڕێوەبەری ناحیەی سەرگەڕان لە پۆستەكانیان دوور خرانەوە.
لەمبارەیەوە مەریوان جەلال، كارگێری لقی كەركووكی پارتی دیموکراتی کوردستان، ڕایگەیاند: “بە بڕیاری راكان جبووری پارێزگاری كەركووك به‌وه‌كاله‌ت، سێ بەرپرسی دیكەی كارگێری كورد كە بریتین لە قایمقامی قەزای دووبز و قایمقامی ناوەندی كەركووك و بەڕێوەبەری ناحیەی سەرگەڕان دوور خرانەوە و ئەو كارە نایاساییە، چونكە گۆڕانكاری لە یەكە کارگێڕییەکان لە دەسەڵاتی ئەنجوومەنی پارێزگاكانە كە ئێستاش ئەنجوومەنەکە سڕ كراوە لە دەسەڵاتی ئەنجوومەنی وەزیرانە، كەچی پارێزگاری سەپێندراوی كەركووك بەرپرسانی كورد لە پۆستەكانیان لادەبات”.
وتیشی: “ئەو سی بەرپرسەی كورد لە دوای 16ی ئۆكتۆبەری 2017ەوە مۆڵەتیان وەرگرتووە و كەسانی تر بە شێوەی وەكالەت لە شوێنەكانیان دانرابوون، بەڵام ئەم جارە بە نووسراوی فەرمی راكان جبووری لە پۆستەكانیان دووری خستەوە”.
ئەو سێ بەرپرسە کوردە بریتین لە هەریەک لە كامیل عەبدوڵڵا ساڵەیی، قایمقامی ناوەندی كەركووك و عەبدوڵڵا نورەدین، قایمقامی قەزای دووبز و لوقمان حوسێن ، بەڕێوەبەری ناحیەی سەرگەڕان كە هەرسێکیان لە دوای داگیركردنی كەركووكەوە ئاوارەی هەرێمی كوردستان بوونە و مۆڵەتی فەرمییان وەرگرتووە تا ئەو كاتەی كە دۆخی كەركووك ئاسایی ببێتەوە و بگەڕێنەوە سەر كارەكانیان.
