سەرۆکی حکوومەتی هەرێمی کوردستان پێشوازیی لە باڵوێزی بەریتانیا لە عێراق كرد و دووپاتی كردەوە: “پشتیوانیی ئەنجامدانی هەڵبژاردنێکی پاک و بێگەرد و یاسایی و دادپەروەرانە دەکەینەوە.”
ئەمڕۆ سێشەممە 30/4/2024، مەسرور بارزانی، سەرۆکی حکوومەتی هەرێمی کوردستان، پێشوازیی لە ستیڤن هیچن، باڵوێزی بەریتانیا لە عێراق کرد، تەوەرێکی سەرەکیی گفتوگۆکان، تایبەت بوو بە گرنگیی ئەنجامدانی هەڵبژاردنی پەرلەمانی کوردستان.
هەردوولا هاوڕابوون لەسەر پێویستیی چارەسەرکردنی کێشە و ئاستەنگەکانی بەردەم هەڵبژاردن و بەشداربوونی هەموو لایەنەکان لە هەڵبژاردندا.
سەرۆکی حکوومەت دووپاتی کردەوە: “پشتیوانیی ئەنجامدانی هەڵبژاردنێکی پاک و بێگەرد و یاسایی و دادپەروەرانە دەکەینەوە کە جێی متمانە بێت، لە ژێر چاودێری و پشتیوانیی کۆمەڵگەی نێودەوڵەتی بەڕێوە بچێت، گەرەنتیی پاراستنی مافەکانی هەموو پێکهاتەکانی هەرێمی کوردستان بکات.”
دابینکردنی مافە دەستوورییەکانی خەڵکی کوردستان و ناردنی مووچە و شایستە داراییەکان و بەردەوامبوونی هاریکاری و پشتیوانیکردنی پێشمەرگە، چەند بەشێکی دیکەی گفتوگۆکان بوو