چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
مەسرور بارزانی: دوای هەوڵ و کۆششێکی زۆر، توانرا چارەسەرێکی گونجاو بۆ کێشەی خەرجکردنی مووچەی مووچەخۆرانی هەرێمی کوردستان دابنرێت
سەرۆکی حکوومەتی هەرێمی کوردستان راگەیاندراوێکی لەبارەی چارەسەرکردنی کێشەی خەرجکردنی مووچەی مووچەخۆرانی هەرێمی کوردستان بڵاوکردەوە.
ئەمڕۆ چوارشەممە 3/4/2024، مەسرور بارزانی، سەرۆکی حکوومەتی هەرێمی کوردستان لە راگەیاندراوێکدا بڵاوی کردەوە: “دوای هەوڵ و کۆششێکی زۆر، بە هاوکاریی هەردوو تیمی سەرۆک وەزیرانی حکوومەتی فیدرال و تیمی حکوومەتی هەرێمی کوردستان، توانرا چارەسەرێکی گونجاو بۆ کێشەی خەرجکردنی مووچەی فەرمانبەران و مووچەخۆرانی هەرێم دابنرێت.”
ئاماژەشی بەوە داوە: “سوپاسی سەرۆک وەزیرانی فیدراڵ، محەمەد شیاع سوودانی و هەموو ئەو هێز و لایەنانه دەکەم کە هاوکار بوون تاوەکوو پێکەوە بتوانین بە سەر ئەو کۆسپ و تەگەرانەدا زاڵ ببین.”
سەرۆکی حکوومەتی هەرێمی کوردستان راشی گەیاندووە: “لە ماوەی ڕابردوودا، هەوڵی زۆر دراوە کە هاووڵاتییانی هەرێمی کوردستان نائومێد بکرێن، بۆیە جارێکی دیکەش سوپاسی خۆڕاگریی فەرمانبەران و مووچەخۆرانی هەرێمی کوردستان دەکەم.”
هەروەها ئەوەشی خستووەتە روو: “لەم دوو ڕۆژەدا دابەشکردنی مووچەی مانگی شوبات کۆتایی دێت و هەوڵ دەدەین بەر لە جەژن، دەست بە دابەشکردنی مووچەی مانگی ئاداریش بکرێت.”
