چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
گوتەبێژی حكوومەتی فیدڕالی ئەمڕۆ چوارشەم روونكردنەوەیەكی لەبارەی ناردنی مووچەی فەرمانبەرانی هەرێمی كوردستان بڵاو كردەوە.
باسم عەوادی گوتەبێژی حكوومەتی عێراق بە ئاژانسی دەنگوباسی عێراقی راگەیاند: بە هاوئاهەنگی لەگەڵ حكوومەتی هەرێمی كوردستان، ناردنی مووچەی فەرمانبەرانی هەرێمی كوردستان بەردەوام دەبێت.
راشیگەیاند: ئەو هەواڵانەی لە میدیاكان و تۆڕەكانی كۆمەڵایەتی بڵاو دەكرێنەوە سەبارەت بە راوەستانی ناردنی مووچە لەلایەن حكوومەتی فیدڕالییەوە بۆ فەرمانبەرانی هەرێمی كوردستان دوورن لە راستییەوە.
باسم عەواد هەروەها رایگەیاند: وەزارەتی دارایی حكوومەتی فیدڕالی پابەندە بە ناردنی مووچەی مووچەخۆرانی هەرێمی كوردستان بۆ مانگی ئادار.
جەختیشی كردەوە كە پێویستە وەزارەتی دارایی فیدڕالی و هەرێمی كوردستان پەلە بكەن لە تەواوكردنی جێگیركردنی مووچە لەو بانكانەی باوەڕپێكراون.
ئێوارەی ئەمڕۆ چوارشەمیش پێشەوا هەورامانی گوتەبێژی حكوومەتی هەرێمی كوردستان لە كۆنگرەیەكی رۆژنامەوانیدا گوتی: مەسرور بارزانی سەرۆكی حكوومەتی هەرێمی كوردستان و محەمەد شیاع سوودانی سەرۆك وەزیرانی عێراق لەپەیوەندی بەردەوام دان بۆ ناردنی تەواوی مووچەی مووچەخۆرانی هەرێمی كوردستان.
