چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
سەرۆك مەسعود بارزانی، پەیامێكی بە بۆنەی یادی 77 ساڵەی دامەزراندنی پارتی دیموكراتی كوردستان بڵاو كردەوە و ڕایدەگەیەنێت: “لەو یادەدا پێزانینم بۆ خەبات و قوربانیدانی جەماوەری پارتی هەیە.”
ئەمڕۆ چوارشەممە 16/8/2023، سەرۆك بارزانی، پەیامێكی بە بۆنەی یادی 77 ساڵەی دامەزراندنی پارتی دیموكراتی كوردستان بڵاو كردەوە و دەڵێت: “بە بۆنەی حەفتا و حەفتەمین ساڵیادی دامەزراندنی پارتی دیموکراتی کوردستان، گەرمترین پیرۆزبایی لە خانەوادەی سەربەرزی شەهیدان و پێشمەرگە قارەمانەکان و سەرکردایەتی و کەوادیر و ئەندام و لایەنگرانی پارتی و سەرجەم خەڵکی کوردستان و خەباتگێڕ و ئازادیخوازان دەکەم.”
سەرۆك بارزانی ئاماژەی بەوەش داوە: “لەو یادەدا پێزانینم بۆ خەبات و قوربانیدانی جەماوەری پارتی هەیە کە لە قۆناغە سەخت و چارەنووسسازەکاندا، هەردەم هەوێنی خۆڕاگری و بەردەوامی و کۆڵنەدان و بەهێزتربوونی دۆزی گەلی کوردستان بوونە.”
هەر لە پەیامەكەیدا، سەرۆك بارزانی ڕایگەیاندووە: “پارتی و ڕێبازی بارزانی لە ڕابردوو و ئێستا و داهاتوودا، هەمیشە جێگەی ئومێد و دەست و بازووی بەهێزی کوردستان و پارێزەر و بەرگریکاری دۆزی ڕەوای گەلی کوردستانن، پێویستە سەرکردایەتی و جەماوەر و ئەندامانی پارتی لە ئاست ئەو بەرپرسیاریەتییە گەورەیەدا بن.”
