چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
رێبەرى رەوتى سەدر تۆمارێکى دەنگى بڵاوکردەوە و تێیدا خۆى بەریکرد لەو کەسانەى کە بانگەشەى ئەوەیان بۆ کردووە ئیمامى مەهدییە و بڕیاریدا مەزارى باوکى دابخات و رێوڕەسمی ماتەمینى یادی کوژرانى نەکردێت.
رۆژی یەکشەممە، 14ـى ئایارى 2023، موقتەدا سەدر، رێبەرى رەوتى سەدر تۆمارێکى دەنگیى لە تویتەر بڵاوکردەوە و ئاماژەى بەوەدا، ئەو لەو کەسانە نییە چاکەى دڵسۆزان و خۆشەویستان و گوێڕایەڵانى پشتگوێ بخات، خۆشى بە خزمەتکاریان ناو دەبات، بەڵام دەیەوێت لە رۆژگارێکى “خراپ” بەدووریان بگرێت.
موقتەدا سەدر گوتى: “دەمەوێت خۆم و لایەنگرانم بەرى بکەم لە هەڵسوکەوتى خراپەکاران کە خاوەنى بیروباوەڕى لادەرن، ئەوانەى بانگەشەى ئەوە دەکەن کە من ئیمامی مەهدیم، ئەوە قسەیەکى مەترسیدار و درۆیە، من نە بانگەشەم بۆ ئەوە کردووە نە بۆشم هەیە ئەوە بکەم، یان هەرکەسێکى دیکە ئەو بانگەشەیەم بۆ بکات”.
