چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
ئەمڕۆ سێشەممە وەزارەتی پەروەردەی حکوومەتی هەرێمی کوردستان لە ڕاگەیەندراوێکدا بڵاوی كردەوە مەسرور بارزانی سەرۆکی حکوومەتی هەرێمی کوردستان، بڕی شەش ملیار دیناری بۆ ناوەندەکانی خوێندنی وەزارەتی پەروەردە تەرخان کرد.
لە راگەیەندراوەكەدا هاتووە لە پارەی تەرخانكراودا، بڕی سێ ملیار دینار بۆ دروستکردنی ژووری نوێی خوێندنە لە ناوەندەکانی خوێندن لە وەزارەتی پەروەردە، لەمبارەیەوە هەموو رێکارەکانی ئەندازەیی و کارگێریی و فەرمانی خەرجی دارایی بۆ دروستکردنی 184 ژووری نوێی خوێندن تەواو بووە لەسەر بودجەی ئاسایی بەڕێوەبەرایەتی گشتیی پەروەردەی پارێزگا و ئیدارە سەربەخۆکان، كە ئێستا دەتوانن دەستبەکار بن بۆ جێبەجێکردن.
وەزارەتی پەروەردەی حکوومەتی هەرێمی کوردستان ئاماژەشی بەوە كردووە كە بڕی سێ ملیار دیناری تر بۆ نۆژەنکردنەوەی 293 قوتابخانەیە، کە رێکارەکانی ئەندازەیی و کارگێریی و فەرمانی خەرجی داراییان لەسەر بودجەی ئاسایی بەڕێوەبەرایەتی گشتیی پەروەردەی پارێزگا و ئیدارە سەربەخۆکان تەواو بووە، ئێستا دەتوانن دەستبەکار بن بۆ جێبەجێکردن.
