چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
ئەمڕۆ دووشەممە 10/10/2022 فەرمانگەی میدیا و زانیاریی حکوومەتی هەرێمی کوردستان ڕایگەیاند، حکوومەت بۆ پاڵپشتیکردنی قوتابییانی کەمئەندام، لەڕێگەی وەزارەتی کار و کاروباری کۆمەڵایەتییەوە، پاسی گواستنەوەی خۆڕایی بۆ 450 قوتابیی کەمئەندام لە ناوەوە و دەوروبەری پارێزگای هەولێر دابین کردووە.
لەم بارەیەوە، تانیا جەمال، سەرپەرشتیاری پەروەردەیی لە دیوانی وەزارەتی کار و کاروباری کۆمەڵایەتی، بە (فەرمانگەی میدیا و زانیاری)ی حکوومەتی هەرێمی کوردستانی ڕاگەیاند: ڕۆژانە لەڕێگەی 50 پاسەوە، هاتوچۆ بە 450 قوتابیی کەمئەندام دەکرێت کە نیشتەجێی ناوەوە و دەوروبەری پارێزگای هەولێرن.
سەرەڕای دابینکردنی پاسی گواستنەوە بۆ هاتوچۆکردنی قوتابییان، حکوومەت مانگانە خەرجیی گیرفانیش بۆ ئەو قوتابییانە خەرج دەکات و یارمەتیی داراییان دەدات بۆ ئەوەی بارگرانیی لەسەر خێزانەکانیان دروست نەکەن.
سەرپەرشتیاریی پەروەردەیی لە دیوانیی وەزارەتی کار و کاروباری کۆمەڵایەتی، ئەوەشی خستووەتە ڕوو: قوتابییەکان لە پۆلی یەکی بنەڕەتی تاوەکوو نۆی بنەڕەتین کە لە پەیمانگا و سەنتەرەکانی سەر بە وەزارەتی کار و کاروباری کۆمەڵایەتی دەخوێنن، ئەوانیش پێک دێن لە پەیمانگای ڕۆناکی نابینایان، پەیمانگای ئاواتی بیرکۆڵان، پەیمانگای هیوای نابیستان، پەیمانگای هانا بۆ شیاندنی کەمئەندامان و سەنتەری ئۆتیزم.
مانگانە لە سەنتەری ڕۆشا بۆ زانستەکانی کۆمپیوتەر، خولی فێربوونی کۆمپیوتەر و مۆبایلی زیرەک بۆ نابینایان دەکرێتەوە و نابینایان فێری بەکارهێنانی کۆمپیوتەر، کیبۆرد و مۆبایلی زیرەک دەکرێن. ئەوەش لە کاتێکدایە، حکوومەتی هەرێمی کوردستان دەیەوێت لەم ڕێگەیەوە خزمەتی زیاتری کەمئەندامان بکات.
