حاکمی دوبەی لەگەڵ مەسرور بارزانی کۆبۆوە و لە کۆبوونەوەکەدا دەرفەتەکانی پەرەپێدانی پەیوەندیی نێوان هەرێمی کوردستان و ئیمارات تاوتوێکراون.
ئەمڕۆ یەکشەممە 27ی ئاداری 2022 شاندێکی باڵای هەرێمی کوردستان بە سەرۆکایەتیی مەسرور بارزانی، سەرۆکوەزیرانی هەرێمی کوردستان لە شاریقە لەگەڵ محەممەد بن راشد ئالمەکتوم، حاکمی دوبەی و سەرۆکوەزیرانی ئیمارات و بەشێک لە بەرپرسانی دیکە کۆبووەوە.
لەبارەی نێوەڕۆکی کۆبوونەوەکەوە، میدیای فەرمیی دوبەی لە تویتەر رایگەیاند، گفتوگۆ لەبارەی کارکردن و هاوکاریکردن لە نێوان هەرێمی کوردستان و ئیمارات کراوە و دەرفەتەکانی گەشەپێدان و بنیاتنان لە هەموو بوارەکان خراوەتەڕوو.
هەروەها پێشتر مەسرور بارزانی لەگەڵ سوڵتان محەممەد بن سەقر، حاکمی شاریقە لە زانکۆی ئەمریکی لە شاریقە کۆبووەوە و دوێنێش لەگەڵ حاکمی رەئس ئەلخەیمە کۆبووەوە.
پەیوەندییەکی بەهێزی ئابووری لەنێوان هەرێمی کوردستان و ئیمارات هەیە، قەبارەی ئاڵۆگۆڕی بارزگانی لەنێوان هەرێمی کوردستان و ئیمارات دەگاتە 2.5 ملیار دۆلار. 136 کۆمپانیای ئیماراتی لە هەرێمی کوردستان کاردەکەن.