چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
لە ئەنجوومەنی نوێنەرانی عێراق لە لایەن فڕاکسیۆنی پارتی پێشانگای وێنەکانی بارزانی نەمر کرایەوە، پەرلەمانتارێکیش دەڵێت، میوانێکی زۆر بانگھێشتی پێشانگاکە کراون.
شوان کەلاری، ئەندامی پەرلەمانی عێراق لە فڕاکسیۆنی پارتی، ڕاگەیاند: “لە لایەن فڕاکسیۆنی پارتی لە ئەنجوومەنی نوێنەرانی عێراق، پێشانگای وێنەکانی بارزانی نەمر لەناو باڵەخانەی ئەنجوومەنی نوێنەرانی عێراق کرایەوە، میوانێکی زۆر تێدا بەشداری دەکەن”.
شوان کەلاری دەڵێ: “وێنەکان باس لە قۆناغەکانی خەباتی بارزانی دەکەن، لە ڕاستیدا بارزانی نەمر، تەنھا موڵکی پارتی و باشووری کوردستان نییە، پێویستە ڕێبازی بارزانی لەلایەن ھەموو تاکێکی کورد لە ھەر چوارپارچەی کوردستان و جیھان بکرێتە بنەمای خەباتی ڕووبەڕووبوونەوەی دیکتاتۆریەت و بەدەستھێنانی ئازادی و چەسپاندنی بنەماکانی دیموکراسی، ھەروەھا بارزانی جەنەڕاڵێکی گەورە بووە لە ڕۆژھەڵاتی ناوەڕاست”.
کەلاری، ئاماژە بەوەش دەکات: “بارزانی نەمر پاش ڕووخانی حکوومەتی پاشایەتی و ھاتنە سەر دەسەڵاتی ڕژێمی عەبدولکەریم قاسم، گەڕایەوە وەک کەسایەتێکی گەورەی کوردستانی و عێراق پێشوازی لێکرا، ئەم پەرلەمانی عێراقە پاش ڕووخانی ڕژێمی بەعس، بەری ڕەنجی خەباتی ئازادی خوازانی عێراقە”.
وتیشی: “گرینگە ساڵانە پێشانگای وێنە و خەباتی بارزانی نەمر بکرێتەوەو لایەنەکانی نوێی عێراق ئاشنا ببن بە خەباتی بارزانی نەمر، کە ڕەمز و سمبولە لەسەر ئاستی کوردستان و عێراق، بۆیە ساڵانە لە باڵەخانەی ئەنجوومەنی نوێنەران پێشانگای وێنەکانی بارزانی نەمر دەکرێتەوە بە ئامادەبوونی فڕاکسیۆنەکان و میوانان”.
