مەسرور بارزانی: پێكوتە وەربگرن و ئازیزانتان لە كۆرۆنا بپارێزن

ئەمڕۆ یەكشەممە مەسرور بارزانی سەرۆكی حكوومەتی هەرێمی كوردستان داوای لە هاووڵاتییان كردەوە پێكوتەی دژە پەتای ڤایرۆسی كۆرۆنا وەربگرن، تا خۆیان و ئازیزانیان لە پەتای كۆرۆنا بپارێزن.

سەرۆكی حكوومەت لە هەژماری خۆیدا لە تۆڕی كۆمەڵایەتیی (تویتەر) بڵاوی كردەوە “داوا لە کوردستانیان دەکەم پێكوتە وەربگرن، خۆتان و کەسە ئازیزەکانتان لە پەتای ڤایرۆسی کۆڕۆنا بپارێزن”.

ئاماژەشی بەوە كردووە كە تا ئێستا بڕی 2,536,199 ژەمە پێكوتە دەستەبەر کراوە و بڕی 1,528,644 ژەمە پێكوتەش بە خەڵک دراوە.

مەسرور بارزانی رای گەیاندووە كە لە هەر یەکێک لە 200 بنکەکە، هاووڵاتی دەتوانێ بەبێ بەرانبەر پێكوتە وەربگرن. هەروەها ئەم لینكەی خوارەوەشی داناوە لە تویتەکەیدا کە لە ڕێگەیەوە خەڵک دەتوانن بە ئۆنڵاین ناوی خۆیان تۆمار بکەن بۆ وەرگرتنی پێكوتە.
https://t.co/wZ4dpxXZBL