لە سەردانە فەرمییەکەیدا بۆ واشنتن لە 23ـی ئەیلوولی 2026، شی جینپینگ سەرۆکی چین لەلایەن دۆناڵد ترەمپەوە لەسەر فەرشی سووری فڕۆکەخانەی سەربازی پێشوازی لێدەکرێت کە ئەمەش هەنگاوێکی دەگمەنە لە پرۆتۆکۆڵی سەرۆکایەتیی ئەمریکادا. سەرۆکی چین سەرەڕای بەڕێوەچوونی 81ـەمین لوتکەی نەتەوە یەکگرتووەکان لە نیویۆرک، ناچێتە ئەو شارە و تەنیا لە واشنتن دەمێنێتەوە بۆ یەکلاکردنەوەی چەندین پرسی ئابووری و سەربازی لەگەڵ سەرۆکی ئەمریکا.
تەوەر و دۆسیە سەرەکییەکانی گفتوگۆ:
- تاوتوێکردنی کەمکردنەوەی باجە گومرگییەکان لەسەر کاڵا ناستراتیجییەکان و هەناردەی کانزا دەگمەنەکانی چین.
- بەدواداچوون بۆ ڕێککەوتنی نێوان هەردوو وڵات کە لە نیویۆرک بۆ دانانی چوارچێوەی دیالۆگ لەسەر ژیریی دەستکرد واژۆ کرابوو.
- تاوتوێکردنی پرسی فرۆشتنی چەکی ئەمریکی بە تایوان و ناکۆکییە ئەمنییەکانی تایبەت بەو دوورگەیە.
- پرسی جەنگی ئێران و گوشارەکانی واشنتن لەسەر پەکین بۆ کەمکردنەوەی کڕینی نەوتی خاوی تاران.
پرۆتۆکۆڵی پێشوازی و پەیوەندییە ئابوورییەکان:
لە ڕەهەندی پرۆتۆکۆڵ و ئابووریدا، دۆناڵد ترەمپ کاتژمێر 4ـی ئێوارەی ڕۆژی چوارشەممە لە فڕۆکەخانەی “جۆینت بەیس ئەندرێوس” پێشوازی لە سەرۆکی چین و هاوسەرەکەی دەکات؛ هەروەها بەرنامەی سەردانەکە پێشوازیی سەربازی لە باخچەی ڕۆز و سازکردنی ئێوارەخوانێکی فەرمی لە کۆشکی سپی لەخۆدەگرێت، بە بەشداریی بەڕێوەبەرانی کۆمپانیاکانی وەک ئەپڵ، تسلا، ئۆپن ئەی ئای، ئەمازۆن لەلایەنی ئەمریکی، و بەڕێوەبەرانی شیاومی، بی وای دی و کاتڵ لە لایەنی چینی.
زانیاریی لەسەر بابەتەکە:
ئەمە یەکەم سەردانی سەرۆکی چینە بۆ کۆشکی سپی دوای زیاتر لە 10 ساڵ؛ هەروەها چوونە فڕۆکەخانەی سەرۆکەکانی ئەمریکا بۆ پێشوازیکردن لە سەرکردە بیانییەکان لە چەند حاڵەتێکی مێژووییدا بووە، وەک پێشوازیی دوایت ئایزنهاوەر لە نیکیتا خرۆشۆڤ لە ساڵی 1959، پێشوازیی جۆرج دەبلیو بۆش لە پاپا بێندیکت لە ساڵی 2008، و پێشوازییەکانی باراک ئۆباما لە پاپا فرانسیس و شی جینپینگ لە ساڵی 2015دا.
