چرکە دامەزراوەیەکی میدیایی ئەهلی و ئازادە، خاوەنی گۆڤار و ماڵپەڕی چرکەیە
ئەمڕۆ لە دەنگدانی جڤاتی نیشتمانی، سێ ئەندامی نوێ بۆ خانەی راپەڕاندنی بزوتنەوەی گۆڕان هەڵبژێردران، سێ ئەندامەکە هەریەکە لە شێخ کامیل قادر، ئاسۆ رەحیم و سەفین مەلاقەرە بوون.
شێخ کامیل قادر بە 40 دەنگ بووە سکرتێری جڤاتی نیشتمانی بزووتنەوەی گۆڕان و ئاسۆ رەحیم بە 34 دەنگ بووە سکرتێری باژێرەکان، و سەفین مەلاقەرە بە 44 دەنگ بووە سکرتێری فراکسیۆنەکانی بزوتنەوەی گۆڕان، ئەنجامی دەنگەکان لە کاتێکدایە کە جڤاتی نیشتیمانی لە 50 ئەندام پێكهاتووە و لە هەڵبژاردنەکەی ئەمڕۆ 47 ئەندام بەشدارییان کردووە.
بۆ هەر یەک لە پۆستەکانی سکرتێری جڤاتی نیشتمانی، سکرتێری کاروباری فراکسیۆنەکان و سکرتێری کاروباری باژێڕەکانی بزووتنەوەکە دوو هەڵسوڕاو خۆیان بەربژێر کردبوو.
خانەی راپەڕاندنی بزووتنەوەی گۆڕان، لە حەوت ئەندام پێکهاتووە، هەریەک لە رێکخەری گشتی و سکرتێرەکانی کاروباری جڤاتی نیشتمانی، جڤاتی گشتی، ژوورەکان، باژێرەکان، فراکسیۆنەکان و کاروباری خەڵک ئەندامی خانەکەن.
لەماوەی مانگی رابردوودا هەریەک لە شەماڵ عەبدولوەفا، ئەندامی خانەی راپەڕاندن و سکرتێری کاروباری باژێرەکان، عەدنان عوسمان، ئەندامی خانەی راپەڕاندن و سکرتێری جڤاتی نیشتمانی بزووتنەوەی گۆڕان و جەلال جەوهەر، ئەندامی خانەی راپەڕاندن و سكرتێری كاروباری فراكسیۆنەكان دەستیان لە ئەندامێتیی خانەی راپەڕاندنی بزووتنەوەی گۆڕان کێشایەوە.
رۆژی 30/1/2021 جڤاتی نیشتیمانی گۆڕان کۆبووەوە، دلێر عەبدوڵخالق رێکخەری ژووری رۆژنامەڤانی بزوتنەوەی گۆڕان بە گوتەبێژی نوێی بزووتنەوەکە دیاریکرا. دوای ئەوەی پێشتر عەدنان عوسمان ئەندامی خانەی راپەڕاندن و گوتەبێژی بزووتنەوەکە، ئێوارەی 17/1/2021 دەستلەکارکێشانەوەی خۆی لە ئەندامێتی خانەکە و گوتەبێژی بزووتنەوەی گۆڕان راگەیاند.
